Prof. Xhavit Beqiri e dom Lush Gjergji: në Vatikan është zemra shpirtërore e kulturore
e Evropës dhe e kombit shqiptar
“Jemi shtegtarë në Vatikan, në këtë hapësirë shpirtërore e kulturore në qendër të
Evropës që kapërcen kufijtë dhe mbërrin shtytjet e forcat e ndryshme të Kontinentit,
ku gjendet edhe kombi shqiptar”. Kështu mund të përmbledhim pohimet e prof. Xhavit
Beriqit e të dom Lush Gjergjit, Vikarit të përgjithshëm të Kishës katolike të Kosovës,
në studio të Radio Vatikanit. Rasti i kësaj bisede me dy mysafirët e nderuar, është
shtegtimi i një grupi besimtarësh nga Kosova në Vatikan, pranë varreve të Apostujve
Pjetër e Pal, organizuar ditë më parë, me rastin e Vitit të fesë e të 1700-vjetorit
të Ediktit të Milanos, së bashku me besimtarë nga Shqipëria, Mali Zi e diaspora. Për
herë të parë pas pagëzimit, pohon prof. Xhavit Beqiri,tha në mikrofonin e R.V. se
ka zgjedhur shtegtimin shpirtëror në Vatikan, pse aty gjen udhën e reflektimit e të
meditimit. Prof. Xhavit Beqiri e dom Lush Gjergji në mikrofonin e Radio Vatikanit
flasin për domethënien e shtegtimit, për vlerën që ka besimi në Zotin në shoqërinë
bashkëkohore, për vlerën e përmasës shpirtërore e kulturore në jetën personale e atë
shoqërore. Sipas tyre, kur viziton Vatikanin, ke përshtypje se je në një ndër vendet,
ku të ofrohet mundësia të hedhësh vështrimi mbi kohën e lashtë, të sotmen e të ardhmen
e popullit shqiptar. Këtë pikërisht në saje të pranisë së madhe të thesareve shpirtërore
e atyre historiko kulturore që ruhen në Vatikan e që flasin edhe për historinë e veçantë
të kombit shqiptar. Së fundi flasin për përforcimin e vlerave shpirtërore e atyre
etnike në gjirin e popullit shqiptar, në realitetin e ri të shoqërisë kosovare, që
premton për një të ardhme shumë të mirë. Po ta dëgjojmë bisedën me prof. Xhavit
Beqirin e dom Lush Gjergjin........