Papa Françesku priti në Vatikan Presidentin e Kepit të Gjelbër
Papa Françesku priti sot, në Pallatin Apostolik të Vatikanit, presidentin e Kepit
të Gjelbër, Jorge de Almeida Fonseka, i cili më pas u takua edhe me Sekretarin e Shtetit
të Shenjtërisë së Tij, kardinalin Tarçizio Bertone dhe imzot Dominik Mambertì, Sekretar
për Marrëdhëniet me Shtetet.“Gjatë bisedimeve, njofton një komunikatë e Sallës së
Shtypit të Vatikanit, u kujtuan marrëdhëniet e mira ndërmjet Selisë së Shenjtë dhe
Republikës së Kepit të Gjelbër. Në mënyrë të veçantë u fol për Marrëveshjen ndërmjet
Republikës dhe Selisë Apostolike, lidhur me statusin juridik të Kishës katolike në
vend, që do të nënshkruhet së shpejti në kryeqytetin Praia”, gjatë një udhëtimi të
imzot Mambertì në arkipelag. “Në këto rrethana, vijon komunikata, u fol edhe për identitetin
kulturor e fetar të popullsisë vendase, shumica e së cilës është e krishterë, si
dhe për rolin e rëndësishëm, që ka luajtur e vijon të luajë Kisha katolike në vend
me institucionet edukative e shëndetësore. Së fundi u cekën edhe disa nga sfidat më
të rëndësishme, para të cilave ndodhet vendi e rajoni, si dhe tema e pranisë së banorëve
të Kepit, emigrantë në shumë vende të botës”.