2013-06-01 11:21:57

Ռռուսական Ղեկավարութիւնը Լաւապէս Կը Գիտակցի, Որ Ասատի Վարչակարգը Ի Վերջոյ Վերջ Պիտի Գտնէ


Իսրայէլի պաշտպանութեան նախարար Էհուտ Պարաք համոզում յայտնեց, որ «Սուրիոյ շուրջ դիւրին լուծումներ գոյութիւն չունին»` թուելով «սուրիական տագնապին լուծման գծով ընտրանքներ, ներառեալ` զինուորական լուծումը»:
Պարաք բրիտանական «Տէյլի Թելեկրաֆ» օրաթերթին մէջ լոյս տեսած իր յօդուածին մէջ գրեց, որ «ներկայիս սուրիական տագնապին շուրջ յաջող որոշումի մը լաւագոյն առիթը Ռուսիոյ ղեկավարութեամբ դիւանագիտական նախաձեռնութիւն մըն է»: Ան ըսաւ, որ «Քրեմլին Սուրիոյ նախագահ Պաշշար Ասատը հեռացնելու կամ առնուազն բախումները դադրեցնել համոզելու բաւարար ազդեցութիւնը ունի»` նշելով, որ «ռուսերը անցնող չորս տասնամեակներուն ընթացքին Ասատ ընտանիքին մօտ քաղաքական եւ զինուորական մարզերուն մէջ մեծ ներդրումներ կատարեցին»:
Պարաք յայտնեց, որ «ռուսական ղեկավարութիւնը լաւապէս կը գիտակցի, որ Ասատի վարչակարգը ի վերջոյ վերջ պիտի գտնէ»: «Պէտք է Ռուսիան համոզել, որ ղեկավարէ Սուրիոյ շուրջ միջազգային ջանքերը` նկատի ունենալով, որ անիկա միջազգային կարեւոր ուժ մըն է, եւ պէտք է անոր շահերն ու տեսակէտները լրջութեամբ նկատի առնուին»:
Մոսկուայի մէջ Իրանի դեսպան Սայետ Մահմուտ Ռիտա Սաժատի յայտնեց, որ իր երկիրը մտադիր է սուրիական տագնապի խաղաղ լուծման միջազգային ժողովին մասնակցիլ, եթէ այդ ուղղութեամբ հրաւէր մը ստանայ: Ռուսական «ՌԻԱ Նովոսթի» լրատու գործակալութիւնը կը հաղորդէ, որ Սաժատի ըսած է, որ «եթէ Իրան խորհրդաժողովին մասնակցութեան հրաւէր ստանայ, ապա անկասկած պատրաստ է ազդու կերպով մասնակցելու սուրիական տագնապի լուծման շուրջ բանակցային հոլովոյթին, սակայն մինչեւ հիմա այդ ուղղութեամբ պաշտօնական հրաւէր մը չէ ստացած»:








All the contents on this site are copyrighted ©.