Папа Францішак сустрэўся
з групай цяжка хворых дзяцей, якія праходзяць лячэнне ў дзіцячым анкалагічным аддзяленні
рымскай клінікі “Gemelli”. Сустрэча адбылася вечарам 31 мая ў капліцы Дома св. Марты.
У ёй прынялі ўдзел 22 дзіцяці ў суправаджэнні бацькоў, медыцынскага персаналу бальніцы,
святароў і законніц. Маленькія госці падарылі Пантыфіку малюнкі гроты лурдскага санктуарыя,
які наведалі некалькі тыдняў таму, а Мішэль Нуньес прызналася, што ў Лудзе дзеці маліліся
за Святога Айца. “Дарагі папа Францішак (...). Як цудоўна бачыць цябе наяве, а не
толькі па тэлевізары! У Лурдзе мы маліліся за цябе і намалявалі гроту Маці Божай,
каб падарыць табе. Мы абяцаем, што будзем маліцца за цябе далей і просім, каб і ты
маліўся за ўсіх хворых дзяцей у “Джэмелі” і ва ўсім свеце. Благаславі ўсіх маці і
татаў, каб заўсёды мелі такую прыгожую ўсмешку, як у цябе”, - сказала Святому Айцу
адна з удзельніц сустрэчы.
Папа, у сваю чаргу, звярнуўся да прысутных з простымі
і цёплымі словамі. Ён нагадаў, што Езус любіць усіх дзяцей і заўсёды знаходзіцца побач
з імі: у шчасці і ў праблемах. “Што робіць Езус калі бачыць дзіця, якое плача? Спыняецца?
Так, Езус спыняецца. Чаму? Таму што дзеці – гэта тыя, каго Езус любіць больш за ўсіх!
Такі Ён – Езус! Ён побач з намі, сёння, побач з вамі ўсімі, хто прыйшоў сюды. Сапраўды.
Езус тут з намі!”, - сказаў Папа.
На заканчэнне сустрэчы Францішак памаліўся
з дзецьмі малітвай “Ойча наш” і прывітаў кожнага з прысутных асабіста.