Papa Françesku: Zoti është gëzim, Ungjilli nuk shkon përpara me të krishterë të ligështuar
Shpirti Shenjt është ‘autor’ i gëzimit të krishterë e, për të kumtuar Ungjillin, duhet
ta kesh në zemër gëzimin, që dhuron Shpirti Shenjt. Papa Françesku e përsëriti këtë
gjatë Meshës së mëgjesit, kremtuar në Shtëpinë e Shën Martës. Me të, në elter, ishin
kardinali Jozef Tomko, kryeipeshkvi i Faridabad-Delhit, Kuriakose Bharanikulangara
dhe ai i Belo Horizonte, Walmor Oliviera de Azevedo. I pranishëm, edhe një grup punonjësish
të Shërbimeve ekonomike të Vatikanit, shoqëruar nga drejtori, Sabatino Napolitano,
si dhe bashkëpunëtorë të Rojeve Zvicerane. Nuk mund të kumtohet Ungjilli, me fytyrën
e njeriut, që ruan të vdekurin. Papa Françesku skicoi një vijë ndarëse ndërmjet jetës
së vërtetë të krishterë, plot gëzim, e asaj, që jetohet me trishtim. Nxitjen për këtë
reflektim, Papa e mori nga dy leximet e mëngjesit. I pari, i Sofonisë Profet, nis
me thirrjen: “Gëzoju! Brohorit nga gëzimi! Zoti është në mesin tënd”. I dyti, shkëputur
nga Ungjilli, flet për Elizabetën e të birin, i cili galdon nga gëzimi në kraharor
të nënës, duke dëgjuar fjalët e Marisë, që kishte shkuar me nxitim për ta ndihmuar
të kushërirën. Pra, vërejti Papa, gjithçka është gëzim. Gëzim feste. E, megjithatë,
vijoi, ne të krishterët nuk jemi mësuar të flasim për gëzim e për hare; besoj se shumë
herë na pëlqejnë më shumë ankimet. Ndërsa duhet të jemi plot me gëzimin, që është
dhuratë e Shpirtit Shenjt: “Është pikërisht Shpirti Shenjt ai, që na prin:
Ai është autori i gëzimit, Krijuesi i gëzimit. E ky gëzim në Shpirtin Shenjt, na jep
lirinë e vërtetë të krishterë. Pa gëzim, ne të krishterët, nuk mund të bëhemi të lirë,
mbetemi skllevër të trishtimeve tona. I Madhi Pali VI thoshte se nuk mund të çohet
përpara Ungjilli, me të krishterë të trishtuar, mosbesues, të ligështuar. Nuk është
e mundur! Me këtë sjellje, paksi të përmortshme, e? Shumë herë të krishterët duken
më shumë sikur janë duke përcjellë të vdekurin a duke u pjekur përmortshëm, sesa duke
shkuar për të lumnuar Zotin, apo jo? E nga ky gëzim, vjen lavdërimi, lavdërimi i Marisë,
i Sofonisë, i Simeonit, i Anës: lavdërimi i Zotit!”. E si lavdërohet Zoti?
Lavdërohet duke dalë nga vetvetja; pa asnjë interes, ashtu si pa asnjë interes është
hiri, që na jep, shpjegoi Papa Françesku e, në vijim kërkoi që të gjithë të rrëmojnë
mirë ndërgjegjen lidhur me mënyrën si duhet t’i lutemi Zotit, duke u drejtuar atyre,
që e dëgjonin, pyetjen: “Ju, që jeni këtu, a e lavdëroni Zotin, apo vetëm
kërkoni hire nga Zoti dhe e falënderoni Zotin? Po, a e lumnoni Zotin? Është një gjë
e re kjo, e re në jetën tonë shpirtërore. Ta lavdërojmë Zotin, të dalim nga vetvetja
për ta lavdëruar; na duket sikur humbasim kohë, duke e lavdëruar! E ankohemi: ‘Kjo
Meshë, ufff, sa e gjatë!”. Nësa duhet të shkojmë plot gëzim, sepse ta lavdërosh Zotin
është gjë e bukur! Këtë do të bëjmë në amshim: do ta lavdërojmë Zotin. E nuk do të
jetë aspak gjë e mërzitshme: do të jetë mrekullisht e bukur! Ky gëzim na bën të lirë”.