Motrat Françeskane të Zojës së Papërlyer në Shkodër shtegtare në Vatikan
Motrat Françeskane të Zojës së Papërlyer në Shkodër shtegtare në Vatikan e
Gjenacan, gjatë kësaj jave, në kuadrin e Vitit të Fesë, së bashku me grupin e besimtarëve
shqiptarë nga trevat shqiptare. Në mikrofonin e Radio Vatikani t’i dëgjojmë dëshmitë
e motrave juniore françeskane të Zojës së papërlyer motër Irenea, motër Mirela, motër
Fatmira, motër Mikela, motër Robertina, motër Vera, motër Elizabeta të udhëhequra
nga eprorja motër Maria Ndua. Po të ndalemi te biseda jonë me Motrat rreth domethënies
së shtegtimit shpirtëror që do të thotë kërkim i Zotit dhe pranim i së Vërtetës
së Tij që na bën të lirë dhe i jep kuptim jetës......
Bibla
na paraqet historinë e Izraelit duke u nisur nga Abrahami si një shtegtim që,
me të përpjetat e tëposhtat nëpër udhë të shkurta e nëpër udhë të gjata, në fund të
çon te Krishti…. Hyji shkruan drejtë edhe nëpër rreshta të shtrembër të historisë
njerëzore. Hyji na lë lirinë tonë e, megjithëkëtë, di të gjejë në dështimin tonë rrugë
të reja për dashurinë e tij…një garanci kjo që pohon se Hyji nuk na le të biem, të
rrëzohemi, e një thirrje për ta orientuar jetën tonë rishtas drejt Tij, për të ecur
gjithmonë e përsëri drejt Krishtit. Të shkosh në shtegtim do të thotë të orientohesh
në një drejtim të qartë , të ecësh drejt një caku…. Ndër shtegtarët para ardhjes së
Jezusit ishin disa që kishin harruar cakun e donin ta vinin veten si cak. Mirëpo Zoti
përsëri zgjoi persona që vijuan shtegtimin të nxitur nga vullneti e nostalgjia e cakut,
duke e orientuar jetën e vet drejt cakut përfundimtar. Hovi drejt fesë së krishterë,
fillimi i Kishës së Jezu Krishtit qe i mundshëm, sepse në Izrael ekzistonin persona
me zemër në kërkim – persona që nuk u mjaftuan me doke e traditë, por që kërkuan diçka
më të madhe: Zakaria, Elizabeta, Simeoni, Ana, Maria e Jozefi, të Dymbëdhjetët e shumë
tjerë. Duke qenë se zemra e tyre ishte në pritje, ata patën mundësinë që në Jezusin
të njihnin Atë që Hyji e pati dërguar për t'u bërë kështu zanafillë e familjes së
vet universale. Kisha e popujve është bërë e mundshme, sepse si në Mesdhe si në Azinë
e afërt e të mesme, ku arrinin lajmëtarët e Jezu Krishtit, kishte persona në pritje
që nuk u mjaftonin e nuk kënaqeshin me atë që bënin e mendonin të gjithë, por kërkonin
yllin që mund t'u tregonte atyre udhën drejt së Vërtetës, drejt Zotit të gjallë. Edhe
sot nuk është e mjaftueshme të jemi e të mendojmë në një farë mënyre si të gjithë
tjerët. Projekti i jetës sonë shkon më tej. Ne kemi nevojë për Zotin, për atë Zot
që na ka zbuluar e treguar fytyrën dhe hapur zemrën e vet: Jezu Krishtin. Vetëm
Ai është Hyj e për këtë vetëm Ai është ura, që vë në kontakt të menjëhershëm Zotin
e njeriun. Nëse ne e quajmë Ndërmjetësues të vetëm të shpëtimit të vlefshëm për të
gjithë, që u intereson të gjithëve e prej të cilit, përfundimisht, të gjithë kanë
nevojë, kjo nuk do të thotë aspak përçmim e përbuzje të feve tjera, as absolutizimi
mendjemadh i mendimit tonë, por vetëm të jesh i pushtuar nga Ai që na ka prekur në
brendësi e që na ka mbushur me dhurata, në mënyrë që ne nga ana jonë të mund të t'ia
dhuronim të tjerëve ….feja jonë i kundërvihet vendosmërisht dorëzimit pa kushte e
atij mendimi që e konsideron njeriun të paaftë për të vërtetën- thua se kjo është
tepër e madhe për të. Ky dorëzim pa kushte para së vërtetës është thelbi i krizës
së shoqërisë bashkëkohore. Nëse për njeriun nuk ekziston e vërteta, ai, në fund, nuk
mund as të dallojë mes të mirës e së keqes. E atëherë njohuritë e mëdha e të mrekullueshme
të shkencës bëhen të dykuptimta: mund të hapin perspektiva të rëndësishme për të mirën,
për shpëtimin e njeriut, por edhe – e këtë e shohim – mund edhe të bëhen kërcënime
të tmerrshme, shkatërrim i njeriut dhe i botës. Ne kemi nevojë për të vërtetën. E
është qartë, se për shkak të historisë sonë kemi frikë se feja në të vërtetën mund
të sjell mostolerim, mosdurim. Nëse kjo frikë, që ka arsye të mira historike, na pushton,
ka ardhur koha ta vështrojmë Jezusin siç e shohim në shenjtëroren e botës, siç e shohim
në Vende të shenjta.. duke iu dhuruar njeriut vetëm përmes pushtetit të brendshëm
të të qenurit të tij të vërtetë. E vërteta e dëshmon veten në dashuri. " Shikojeni
Krishtit", mund të themi se ishte nxitja e këtij shtegtim. Hyji nuk vjen me forca
të jashtme, por vjen në pafuqinë e dashurisë së vet, që përbën edhe forcën e Ti. Jezusi
foshnje na përkujton të gjithë fëmijët e botës e ata shqiptarë, në të cilët do të
vijë të na takojë. Fëmijët që jetojnë në varfëri; që shfrytëzohen si ushtarë; që kurrë
nuk e kanë përjetuar dashurinë e prindërve; fëmijët e sëmurë e plotë vuajtje, por
edhe ata të lumtur e të shëndoshë. Evropa është bërë e varfër pa fëmijë: ne duam gjithçka
për vete, e ndoshta nuk kemi shumë besim në të ardhmen. Por pa të ardhme toka do të
jetë vetëm kur shuhen forcat e zemrës njerëzore e të arsyes së ndriçuar nga zemra-
kur fytyra e Zoti nuk do të shndrisë më mbi tokë. Ku ka Zot, aty ka edhe të ardhme,
ka shpresë. "Shikojeni Krishtin"! Hyji e ka shëlbuar botën jo përmes shpatës, por
përmes Kryqit. "Shikojeni Krishtin!" Nëse e bëjmë këtë, do të kuptojmë se krishterimi
është diçka më tepër e diçka ndryshe e tjetër nga një sistem i moralit, nga një sërë
kërkesash e ligjesh. Është dhuratë e një miqësie që zgjatë e qëndron në jetë e në
vdekje. E pikërisht duke u nisur nga fakti se krishterimi është më tepër se morali,
mu për këtë është dhuratë e një miqësie, e për këtë bart në vete edhe një forcë të
madhe morale për të cilën ne, para sfidave të kohës sonë, kemi kaq nevojë. Ajo para
së gjithash është një "po" ndaj Zotit, që na sjell e, megjithëkëtë, na lë lirinë tonë,
madje, e bën liri të vërtetë. Është një "po" ndaj familjes, një “po” ndaj bashkësisë
rregulltarë, një "po" ndaj jetës, një "po" ndaj një dashurie të përgjegjshme, një
"po" ndaj së vërtetës e një "po" ndaj respektimit të personave të tjerë e të asaj
që u përket atyre. Në sajë të forcës së miqësisë sonë me Zotin e Gjallë ne jetojmë
këtë "po" të shumëfishtë e njëkohësisht e bartim si tregues të përshkimit brenda jetës
sonë e brenda botës sonë. Në përfundim të muajit maj, t’i kërkojmë me lutje Virgjërës
Mari Nënës së Zotit, të vazhdojë të na dhurojë gjithnjë Jezusin, Birin e Zotit, Dritën
e vërtetë të botës. Këtë dritë, Krishtin, në lutjen e tij, na mëso o Zoja Mari ta
njohim e ta duam, në mënyrë që edhe ne të mund të jemi të aftë për një dashuri të
vërtetë e të jemi burimet e ujit të gjallë në mes të një bote të etur për të vërtetën
hyjnore.
E ja edhe disa të dhëna rreth Kongregatës së Motrave Françeskane
të Zojës së Papërlyer
Historia e Kongregatës Kongregata e motrave
Françeskane të Zojës së Papërlyer – Motrat Shkollore, themeluar në Grac të
Austrisë në vitin 1843, ku aktualisht është edhe Shtëpia Nënë. Karizma e kësaj Kongregate
është shkollimi dhe edukimi i vajzave, në fe dhe në kulturë të përgjithshme. Si
ka lindur kjo Kongregatë? Antonia Lampel dhe motra e saj Amalia Lampel ishin
mësuese në shkollën private të udhëhequr nga zonjusha Ana Engel në Neuthogasse. Pas
vdekjes së themelueses së kësaj shkolle, drejtimin e mori Amalia, jo Antonia edhe
pse ishte më e madhe. Antonia kishte arsim të lartë, ajo zotëronte shumë mirë gjuhën
francese dhe italiane, kishte talent për vizatim dhe muzikë, por në veçanti ishte
e talentuar në punëdore. Antonia edhe pse kishte aftësi të veçanta, ishte shumë e
ndrojtur. Ajo nuk kishte dëshirë të urdhëronte, por vetëm të shërbente. Duke qenë
e tillë, kur kishte nevojë të paraqitej para të tjerëve, ajo gjithnjë shtynte të motrën
e vet, e cila ishte tre vjet më e vogël, Amalian, më e guximshme dhe më e gjallë se
ajo. Megjithatë, nuk dyshohet se Antonia ishte shpirti i shkollës edhe pse ajo drejtohej
nga Amalia. Kështu motrat Lampel me një grup mësuesesh të reja e ngritën shkollën
e tyre në një nivel të lartë. Por jo vetëm kaq, ato jo vetëm që ditën t’i përgatitnin
ndihmëset e tyre që të bëhen mësuese dhe edukatore të mira, por edhe që të bëhen të
krishtera të mira dhe të përshpirtshme. I gjithë grupi hyri në Urdhrin e Tretë të
shën Françeskut dhe me një entuziazëm të lartë u munduan që në jetën e përditshme
ta realizojnë idealin e shën Françeskut, në veçanti dashurinë e tij ndaj varfërisë.
Pra, detyra kryesore e rregullit ishte varfëria françeskane. Ato si vajza të pasura
qytetare, të gjitha forcat dhe aftësitë e tyre i vunë në shërbim të shkollimit të
vajzave "të shtresave më të ulta". Bashkëpunëtoret e tyre gjithashtu i kishin edukuar
me idealet e shën Françeskut, kështu që ato jetuan së bashku në një bashkësi, që sipas
mendimit të tyre nuk ishte përcaktuar për një jetë të vërtetë rregulltare. Ato ishin
të kënaqura me gjërat më të domosdoshme për jetesë; shtëpia e tyre ishte shumë të
vogël, pasi ato ngushtoheshin vetëm e vetëm që të pranonin një numër sa më të madh
vajzash të varfra dhe që nuk kishin mundësi të paguanin. Në shkollë mbizotëronte numri
i atyre nxënësve që nuk paguanin. Në këtë mënyrë dashuria e tyre për varfërinë kishte
kuptim të madh shoqëror. Në përgjithësi i gjithë mundi i tyre ishte në shërbim të
shoqërisë. Ato nuk kërkuan një përsosmëri të veçantë për veten e tyre, por vetëm
dëshironin t'i shërbenin Zotit duke i shërbyer në Kishë dhe në të afërmin. Atyre u
mungonte vetëm leja nga Institucionet Kishtare për të qenë rregulltare të vërteta.
Ato do të banojnë dhe do të luten së bashku, por edhe do të punojnë sikurse edhe punonin,
por tani edhe më me vetëmohim. Duke u nisur nga kjo mënyrë jete ato i drejtohen ipeshkvit
me një lutje (Magna Carta) në të cilën përfshihet i gjithë projekti i jetës së tyre
në bashkësi. Arsyet kryesore ku mbështetet projekti i të kushtuarave janë si vijojnë:
përvoja e tyre në përgjithësi tregon se: bashkimi bën fuqi, në veçanti nëse ato janë
të njësuara në Zotin, të cilit i përkushtohemi krejtësisht. "Pa kushte, për
të mirën e njerëzimit, heqim dorë nga vullneti ynë, heqim dorë nga interesat tokësore,
lirohemi nga lidhjet e botës së jashtme dhe marrëdhëniet me ta, të cilat shumë herë
pengojnë apo prishin edhe nismat më fisnike". Të përvuajturat nuk dyshojnë
aspak se nuk do të kenë mundësi t'u përgjigjen dëshirave të tyre, pasi mënyra me të
cilën dëshirojnë të jetojnë në bashkësi është e thjeshtë dhe e përvuajtur, madje e
miratuar në shumë vende të Austrisë, prej pushtetit kishtar dhe atij laik. Të nënshkruarat
e ndiejnë se janë të frymëzuara prej Zotit për të zgjedhur Urdhrin e Tretë të shën
Françeskut serafik, të cilin me aq sa kanë mundur, e kanë njohur dhe e kanë praktikuar
shumë vite më parë, pasi ky urdhër në radhë të parë është për ata që kushtimin e tyre
e praktikojnë në botë. Të nënshkruarat e përvuajtura mendojnë, se me fjalët e
shprehura kanë paraqitur në mënyrë të mjaftueshme lutjen e tyre të përvuajtur. Faktikisht
ato dëshirojnë që të bashkohen në jetën rregulltare për ta edukuar rininë me shpirtin
e përvujtërisë dhe të vetëmohimit.
Themelimi Kur Antonia Lampel
dhe shoqet e saja themeluan bashkësinë e tyre rregulltare, Antonia dëshironte që Kisha
ta miratonte mënyrën e jetës së tyre deri atëherë të jetuar. Ajo nuk ka dashur të
imitojë ndonjë kongregatë, por vetëm që, edhe në të ardhmen, të mbahen Rregulloret
e Urdhrit të Tretë, ashtu siç i mbanin edhe më parë. Antonia i ka shtuar vetëm disa
pika të tjera, që kishin të bënin me rendin e kuvendit dhe mbajtjen e kushteve. Sipas
Antonias kuvendi duhej drejtuar prej motos: “E kushtoj veten time për ta”,
kjo fjalë e Krishtit ka pasur vlerë të lartë për të. Motrat e saja duhej të drejtoheshin
me dëshirë kah shenjtëria, kah bashkimi me Zotin, jo edhe aq për shkak të tyre, sesa
për arsye të përmbushjes së detyrës që kishin marrë përsipër. “Ne duhet të
jemi të përvuajta, sinqerisht, të jemi të vogla para Zotit, që Ai të na marrë në duart
e Tij të fuqishme e kështu Ai vetë, së bashku me ne, t'i edukojë fëmijët. Gjithsesi,
ne e dimë se bekimi duhet të vijë prej së larti, prej Atit të Dritës. Posa ta harrojmë
këtë gjë, do ta ndiejmë se jemi të paafta”. Në themelimin e kësaj bashkësie
rregulltare, Antonia si të vetmin qëllim kishte që t’i ndihmonte anëtaret për një
punë më intensive dhe më të frytshme, në nder dhe lavd të Zotit dhe për të mirën e
shpirtrave, me një fjalë për apostullim. Papa Gregori XVI me shkresën e tij të
datës 15 korrik 1843, lejoi themelimin e “Institutit të Motrave Shkollore të Urdhrit
të Tretë të shën Françeskut në Grac”, si dhe Statutet e parashtruara. Kështu me
29 shtator 1843, Antonia Lampel (Nëna Françiska), me ndihmën e arqipeshkvit Roman
Sebastian Zängerle, themeloi në Grac bashkësinë tonë rregulltare. Nën udhëheqjen
e eprores së dytë, Nënës Agnesa Pfund u paraqiten ndryshime rreth botëkuptimit të
jetës rregulltare lidhur me detyrat e edukimit. Kështu pasi ato çuan në tensione brenda
bashkësisë, nëna Françiska e braktisi Institutin me qëllim që të shpëtojë unitetin
e bashkësisë. Tre muaj më vonë ajo vdiq nga “tuberkulozi në mushkëri”.
Degëzimet Nga
Kongregata e Motrave Shkollore të Gracit janë ndarë institute të pavarura: 1860
– Vöcklabruck 1869 – Maribor 1888 – Çeki
Provinca brenda Kongregatës
së Motrave Shkollore: Që nga viti 1857 në Shtajermark dhe në vendet e tjera, në
mëyrë të vazhdueshme u themeluan filialet e reja. Ndryshimet politike dhe pjesërisht
largësitë e mëdha territoriale, çoi në ndarjen në provinca. Në vitin 1923 u themeluan
Provinca e Austrisë dhe ajo e Sllovenisë. Në vitin 1929 u themelua Provinca e Brazilit. Në
vitin 1965 u themelua Provinca e Malit të Zi. Në vitin 1968 rajoni i Francës dhe
i Afrikës jugore.
Më 4 korrik 1954 – me shkresën e Romës jemi të njohura si
“KONGREGATA E FRANÇESKANEVE TË ZOJËS SË PAPËRLYER”. Prej provincës së Malit
të Zi motrat kanë ardhur në Shqipëri më 06.04.1992. Nga ardhja në Shqipëri provinca
e Malit të Zi ka themeluar këto bashkësi, që kryejnë këto aktivitete: Në Hot të
Ri – Arqipeshkvia metropolitane e Shkodër-Pultit – veprojmë: katekizëm, udhëheqjen
e këndimit kishtar, kopshtin e fëmijëve, kurse të gjuhëve të huaja, kompjuter, kuzhinë,
rrobaqepësi dhe ndihmë sociale për ata që kanë më shumë nevojë.
Në Shkodër:
Lagjja Ndoc Mazi, Rruga Kongresi i Lushnjes, nr. 63 – shtëpi formimi për kandidatet
dhe motrat që kryejnë studimet e larta. Përveç kësaj bashkësia kryen edhe disa veprimtari:
katekizëm, udhëheqjen e korit, mirëmbajtjen e kishës famullitare (Zoja Rruzare),
vizitë dhe ndihmë të moshuarve e të sëmurëve etj.
Në Tiranë veprojmë në Nunciaturën
Apostolike dhe në Arqipeshkvinë Tiranë-Durrësit udhëheqjen dhe mirëmbajtjen e amvisnisë
dhe katekizëm, gjithashtu të njëjtën veprimtari e zhvillojmë edhe në Administraturën
e Jugut në Fier.
Në Kallmet – Në Administraturën e Lezhës bëjmë këto aktivitete:
katekizëm, kopsht fëmijësh, shkollë fillore, mirëmbajtjen e kishës, udhëheqjen e korit,
kurse kuzhine, rrobaqepësie, vizita dhe ndihmë të sëmurëve dhe të varfërve.
Në
Lezhë jemi duke ndërtuar kuvendin dhe shkollën 8 – vjeçare.
ADRESAT: KONGREGATION
DER FRANZISKANERINNEN VON DER UNBEFLECKTEN EMPFÄNGNIS Eggenberg - Georgigasse 84,
8020 Grac Austria E-mail: generalat@schulschwuestern.at PRESENTATION
www.schulschwestern.at
CRNOGORSKA PROVINCIJA FRANJEVKI BEZGREŠNOG ZAČEĆA
Ul.Vojvode Boža 34, 81250 Cetinje CRNA GORA - MONTENEGRO E-mail : franjevke@cg.yu
MOTRAT
FRANÇESKANETË ZOJËS SË PAPËRLYER Lagjja Ndoc Mazi Rruga Kongresi i Lushnjes SHKODER
– ALBANIA E-mail: bashksiashkoder@hotmail.com