Італія: міжнародная канферэнцыя на тэму прыгажосці і літургіі
З 30 мая па 1 чэрвеня
ў Бозэ на поўначы Італіі праходзіць ХІ Міжнародная літургічная канферэнцыя, на тэму
“ІІ Ватыканскі Сабор. Літургія, архітэктура, мастацтва”. Яна прымеркавана да 50-годдзя
прыняцця саборнай канстытуцыі пра святую Літургію “Sacrosantum Concilium”. У форуме,
які праходзіць ў кляштары мясцовай экуменічнай супольнасці, прымаюць удзел спецыялісты
ў галіне літургікі, мастацтва і архітэктуры з Італіі, Францыі, Германіі, Бельгіі,
Швейцарыі, Аўстрыі і Ватыкана. Яны прааналізуюць гістарычныя, тэалагічныя і мастацкія
наступствы канстытуцыі “Sacrosantum Concilium” і асабліва засяродзяцца над яе сёмым
радзелам, прысвечаным сакральнаму мастацтву і літургічным прыналежнасцям.
Сярод
тэм, якія будуць абмярковаўцца: архітэктура і мастацтва падчас ІІ Ватыканскага Сабору,
літургічная эстэтыка, навучанне мастацтву і літургіі, праблема пакаленняў касцёльных
архітэктараў, экуменічныя аспекты літургічнай рэформы, Папы і сучаснае мастацтва.
Адзін
з удзельнікаў канферэнцыі, бельгійскі кардынал Готфрыд Данеэлс, гаворачы пра актуальнасць
дадзенай тэматыкі, адзначыў, што існуюць тры шляхі, якія вядуць да Бога: праўда, дабрыня
і прыгажосць. На старонках “L’Osservatore Romano” пурпурат выказаў меркаванне, што
праўда і дабрыня, з’яўляюцца мала зразумелымі сучаснаму чалавеку, у сувязі з пануючым
скептыцызмам і нявер’ем у існаванне дасканалага дабра. “Такім чынам, брама прыгажосці,
лягчэй адкрываецца для нашых сучаснікаў”, - адзначыў ён. Кардынал Данеэлс дадаў, што
ў сучасных людзей “праўда выклікае сумневы, дабрыня смутак, а прыгажосць абяззбройвае”.
На яго думку, у іншыя эпохі, магчыма, людзі менш адчувалі гэтыя перашкоды ў пошуку
Бога, але сёння менавіта прыгажосць з’яўляецца прывілеяваным шляхам у гэтым накірунку.
“Гэта каралеўскі шлях для чалавека нашага часу, у яго пошуку Бога”, - падкрэсліў пурпурат.
Таму, на яго думку, разважаць над ім у кантэксце літургіі асабліва важна.