Çelësi i fjalëve të Kishës:Kushtetuta “Gaudium et Spes”
Në vazhdën e emisioneve tona për Koncilin II të Vatikanit, do të fillojmë sot t’ju
flasim për dokumentet konciliare, të cilat – po e kujtojmë – janë përkthyer në shqip
kohët e fundit. Sot, Kushtetuta “Gaudium et Spes” (Gëzimi dhe shpresa). Kjo
kushtetutë niset nga presupozimi se për të vazhduar veprën e Krishtit, Kisha duhet
të shqyrtojë shenjat e kohës dhe t’i interpretojë gjithnjë në dritën e Ungjillit.
Vetëm kështu, mund t’u përgjigjet gjithmonë pyetjeve të njerëzve për kuptimin e jetës.
Në “Gaudium et Spes”, jeta fetare kërkon gjithnjë e më tepër bindjen personale, duke
iu larguar konceptimit të saj si magji e bestytni. Në kohën kur u shkrua, me një reflektim
që vlen edhe sot, kushtetuta konciliare vërente se shumë njerëz largohen nga feja
e se ndarja ndërmjet fesë e jetës publike është një nga gabimet më të mëdha të epokës
sonë (44). Është i nevojshëm një ungjillëzim i ri, vazhdonte, por çdo ungjillëzim
bazohet në përshtatjen e predikimit me mendësinë e popujve që e dëgjojnë. Natyrisht,
kjo vlen për formën, pasi përmbajtja e fesë mbetet ajo, që na ka përçuar në shekuj
tradita e krishterë. Njeriu bëhet më njeri përmes kulturës. Por si mund të përhapet
e të ekzistojë një kulturë e re, pa e tradhëtuar traditën? (56) Kisha i përdor kulturat
e ndryshme për të përhapur mesazhin e Krishtit, duke i qëndruar besnike traditës e
duke pasur parasysh universalitetin e misionit të saj. (58) Prandaj, përkimi ndërmjet
kulturës dhe formimit të krishterë mund të paraqesë vështirësi. Janë teologët ata,
theksohet në “Gaudium et Spes”, që duhet të gjejnë mënyrën më të mirë për t’u komunikuar
njerëzve doktrinën, pa ia ndryshuar përmbajtjen. (62) Deri në rënien e Murit të
Berlinit, në vitin 1989, Kishës i është dashur të përballojë formën e ateizmit të
regjimeve të Evropës Lindore, pasojat e së cilës i kanë mirë parasysh shqiptarët,
të cilët u persekutuan si asnjë popull tjetër, pikërisht për shkak të fesë. Sot, pas
rënies së komunizmit, edhe ateizmi e ka ndryshuar formën e vet, por nuk është zhdukur.
Një nga më të përhapurit, është ateizmi praktik, për të cilin Zoti ekziston, por është
krejtësisht jashtë jetës së përditshme, e cila jetohet sipas kritereve, që nuk varen
nga feja. Pasojë e kësaj mënyre veprimi është homologimi, pra, ateisti praktik varet
nga gjithçka mendojnë të tjerët. Tjetër formë e ateizmit rrjedh nga përzierja
e kulturës perëndimore me teknikat kundruese lindore, të cilat çojnë drejt humbjes
së identitetit për ta shkrirë vetveten me një lloj universi të harmonishëm. Për të
arritur në këtë pikë, nganjëherë, përdoren edhe ilaçe, që krijojnë haluçinacione.
Edhe në këto raste, kushtetuta “Gaudium et Spes” këshillon të dëshmohet konkretisht
çdo të thotë të jetosh si i krishterë. Një shembull i tillë mund të jetë një çift
i martuar prej shumë vitesh, që pavarësisht nga rrethanat e jetës, vazhdon të duhet
e madje edhe më fort, duke dhënë një dëshmi të mrekullueshme të krishterë për pazgjidhshmërinë
e martesës. Kushtetuta “Gaudium et Spes” ishte përpjekja e Kishës për të reflektuar
mbi jetën së bashku me epokën, që jetojmë edhe sot. Për të, i Lumi Gjon Pali II thoshte:
“Nuk kishte ndodhur kurrë, në historinë dymijëvjeçare të Kishës, që një Koncil
ekumenik të tregonte shqetësim kaq të thellë baritor për ngjarjet tokësore të njerëzimit.
Prej këndej rrjedh interesi i veçantë, që zgjoi kjo Kushtetutë, nga dalja. Nga ana
tjetër, pa u kufizuar në konsiderata thjesht historike e sociologjike, Etërit konciliarë
përballuan gjerësisht, në këndvështrimin teologjik, pyetjet themelore, të cilat e
shqetësojnë gjithmonë zemrën njerëzore: ‘Ç’është njeriu? Ç’kuptim ka dhimbja, e keqja,
vdekja, të cilat vazhdojnë të ekzistojnë, pavarësisht nga përparimet?’(10). Duke hetuar
kështu, “misterin e njeriut” në dritën e Fjalës së Zotit, e impenjuan, e madje fuqimisht,
bashkësinë e krishterë për të dhënë një kontribut specifik që krejt familja e njerëzve
‘të bëhet më njerëzore’. (40)”