Papa Françesku kryeson adhurimin eukaristik më 2 qershor
Të dielën, më 2 qershor, në orën 17.00, në Bazilikën e Vatikanit, Papa Françesku do
të kryesojë Adhurimin Eukaristik, me të cilin ftohen të bashkohen shpirtërisht të
gjitha dioqezat e botës. Kremtimi mbahet në kuadrin e Vitit të Fesë e në festën e
Koprit të Krishtit. E kur flasim për Eukaristinë, atëherë duhet të pohojmë se Eukaristia
nuk mund të mos jetë qendër e përhershme dhe burim i shërbimit që i është besuar Kishës
nga Jezu Krishti. Gjatë Meshës, nga Eukaristia, ‘zemër e jetës së krishterë’, buron
bashkimi ndërmjet mbarë besimtarëve, impenjimi i kumtimit dhe i dëshmimit të Ungjillit,
zelli për t’u bërë mirë të gjithëve e posaçërisht më të varfërve e më vegjëlve. E
i ftonte besimtarët ta shprehin në mënyrë të guximshme e të qartë fenë në praninë
reale të Zotit në Eukaristi. Festa e Korpit të Krishtit është dita në të cilën
Kisha dëshiron të vërë theksin mbi misterin e madh të Korpit e të Gjakut të Krishtit
në Eukaristinë Shenjte. Zoti Jezus e themeloi Eukaristinë të Enjten e Madhe të Pashkëve.
Por Kisha, me kalimin e kohës, zgjodhi një ditë tjetër për të vënë në pah misterin
Eukaristik, posaçërisht jashtë Meshës. Kështu shfrytëzoi rastin e mrekullisë eukaristike
të Bolsenës, ndonëse duhet theksuar se feja jonë e krishterë nuk bazohet mbi këtë
mrekulli, por mbi zbulimin hyjnor të misterit. Atëherë mund të themi se dita e festës
së Koprit të Krishtit vë theksin mbi adhurimin e Jezusit në të Shenjtnueshmin Sakrament,
gjatë Meshës e jashtë saj. Kremtimi Eukaristik është vërtetë i lidhur me adhurimin
e Eukaristisë jashtë Meshe, sepse është i njëjti Sakrament që nuk mbaron kurrë, por
vijon. Në përfundim të Meshës, hostet që kanë mbetur pas Kungimit të popullit, rivendosen
në Tabernakull. E i njëjti Jezus vijon të jetë i pranishëm. Kështu, dalë-nga-dalë
në Kishë lindi e u zhvillua praktika e Adhurimit Eukaristik, vizita që i bëjnë besimtarët
të Shenjtnueshmit Sakrament e në veçanti, proçesioni eukaristik. Nuk mjafton ta adhurojnmë
Krishtin vetëm si individë. Është e drejtë që edhe si bashkësi të bëjmë një proçesion
në nder të Jezusit të pranishëm në të Shenjtnueshmin Sakrament, ta adhurojmë, ta duam,
të këndojmë himne në lavd të Zotit.