Կիրակի, 26 Մայիս 2013-ին, Անթիլիասի մայրավանքին մէջ Ս. եւ անմահ պատարագով, հոգեհանգստեան
պաշտօնական արարողութեամբ եւ ապա վեհարանին մէջ տեղի ունեցած հանդիսութեամբ արժանաւորապէս
նշուեցաւ Հայաստանի Ա. Հանրապետութեան հռչակման տօնը` Սարդարապատի հերոսամարտով անմահացած
քաջամարտիկներու զոհողութեամբ շահուած: Մայիսքսանութեան փառաւոր յաղթանակի այս տօնը
անուանակոչութեան օրն է նաեւ Մեծի Տանն Կիլիկիոյ Արամ Ա. կաթողիկոսին: Այս մասին կը հաղորդեն
Կիլիկիոյ կաթողիկոսութենէն: Ս. Գրիգոր Լուսաւորիչ Մայր տաճարին մէջ պատարագեց ու քարոզեց
Յովհաննէս աբղյ. Սաղտըճեան, որ անդրադարձաւ 28 Մայիս 1918-ին հայ ժողովուրդի մղած գոյապայքարի
անհրաժեշտութեան: Ս. պատարագի աւարտին, նախագահութեամբ Արամ Ա. կաթողիկոսի, տեղի ունեցաւ
հոգեհանգստեան պաշտօն Սարդարապատի, Ղարաքիլիսայի, Բաշ Ապարանի եւ նոյն թուականին այլ
ճակատամարտներու ընթացքին զոհուած քաջամարտիկներու հոգիներուն համար: Եկեղեցական արարողութենէն
վերջ, հոգեւորականներու թափօրով, գլխաւորութեամբ վեհափառ հայրապետին, ներկայ ժողովուրդը
բարձրացաւ վեհարան, ուր դահլիճին մէջ գեղարուեստական յայտագիր ներկայացուեցաւ, Վարանդ
վրդ. Քորթմոսեան ուղերձ կարդաց: Հայր սուրբը իր ուղերձին մէջ խօսելով մայիս 28-ի մասին
ըսաւ. «95 տարիներ անցած են այն պանծալի թուականէն` Մայիս 28-էն, երբ կերտուեցաւ մեր
հայրենիքի առաջին անկախութիւնը` երկար տարիներու ստրկականութենէ ետք: Այս անկախութեամբ,
իբրեւ հայ ժողովուրդ եկանք կրկին անգամ փաստելու համայն աշխարհին, թէ հայը կեանքին կառչած
ժողովուրդ է եւ գիտէ՛ վերապրիլ, վերակենդանանալ»: Իսկ Արամ Ա. վեհափառին ուղղելով իր
խօսքը հայր Վարանդ ըսաւ. «45 տարիներ առաջ Դուք ուխտեցիք հաւատարմութեամբ ծառայել Աստուծոյ,
հայ եկեղեցւոյ ու հայ ժողովուրդին: Անցնող 45 տարիներուն ընթացքին եւ անշահախնդիր ու
ամբողջական նուիրուածութեամբ ծառայեցիք այս Ս. աթոռին ընդմէջէն հայ եկեղեցւոյ ու հայ
ժողովուրդին: 45 տարիներ, որոնք ոսկեայ շղթայի 45 օղակներուն նման են` փայլքով ու պայծառութեամբ
լեցուն մեր ազգի ու եկեղեցւոյ գանձանակին մէջ դրուած անկորնչելի արժէքներով: 45 տարիներ,
որոնց մանաւանդ վերջին 18 տարիներուն ընթացքին` իբրեւ հայրապետ ու հովուապետ հայրաբար
հոգացիք մեր եկեղեցւոյ ու ազգին, մեր կրթական ու մշակութային օճախներուն տեսակաւոր կարիքները,
ու կը շարունակէք նոյն առաքելութեամբ, քաջ ու անձնդիր հովիւի նոյն նուիրումով»: Հանդիսութեան
աւարտին ներկաներուն իր հայրապետական պատգամը փոխանցեց Արամ Ա. կաթողիկոս: Վեհափառ հայրապետը
նախ եւ առաջ իր գնահատանքը յայտնեց եղած արտայայտութիւններուն եւ մայիսեան փառքը կերտած
բոլոր հերոսներուն յիշատակը անմահացած տեսաւ անոնց յիշատակը յարգողներուն անձին մէջ:
Վեհափառ հայրապետը կարեւորութեամբ շեշտեց, թէ «Մայիս 28-ը սովորական դէպք մը չէ եւ ոչ
ալ պատմութեան մէջ ձեռք ձգուած յաղթանակի մը նշումը: Մայիս 28-ը ոգի մըն է, որ իր մէջ
կը խտացնէ մեր ժողովուրդին հաւաքական հաւատքը, վճռակամութիւնը եւ յանձնառութիւնը` ի խնդիր
հայրենիքի անկախութեան ու մեր ժողովուրդի գերագոյն արժէքներու կենսագործման: Մայիս 28-ը
ոգի մըն է, որ դարձաւ ներկայութիւն մեր պատմութեան ընթացքին, մեր կեանքի տխուր եւ ուրախ
պահերուն, մեր հաւաքական պոռթկումներուն եւ կեցուածքներուն մէջ: Այդ ոգին էր, որ մեր
ժողովուրդին տուաւ հաւատքն ու կամքը` մնալու կանգուն պատմութեան ամեհի ալիքներուն դիմաց:
Այդ ոգին էր, որ մեր ժողովուրդի զաւակները մղեց իմացեալ մահով հայրենիքը պաշտպանելու,
մեր ժողովուրդի իրաւունքներուն տէր կանգնելու, հաւաքական յանձնառութեան: Այսօր երբ Մայիս
28-ը կը նշենք, անցեալին պէտք չէ նայինք, այլ նաեւ ներկային ու մանաւանդ ապագային: Մայիս
28-ի ոգին է, որ մեր ժողովուրդին միշտ պիտի ներշնչէ հայ ժողովուրդի գերագոյն իտէալներուն
համար ապրելու, պայքարելու եւ ի պահանջեալ հարկին նահատակուելու հաւատքն ու վճռակամութիւնը»: Այնուհետեւ
դպրեվանքի երգչախումբը ազգային հայրենասիրական երգեր կատարեց, ինչպէս նաեւ հնչեցուց սարդարապատեան
գոյապայքարին յաղթանակը պանծացնող «Երբ չի մնում ելք ու ճար» երգը, որուն մասնակից դարձաւ
նաեւ ներկայ ժողովուրդը: Մայիսեան հանդիսութիւնը աւարտեցաւ Արամ Ա. կաթողիկոսին պահպանիչ
աղօթքով, որմէ ետք ներկաները աջահամբոյրով իրենց շնորհաւորութիւնները փոխանցեցին վեհափառ
հայրապետին: