Папа заклікаў да глабальнага пераасэнсавання сістэмы адносін у свеце
Папа Францішак сустрэўся
25 мая з членамі фонду “Centesimus Annus Pro Pontifice” з нагоды міжнароднай канферэнцыі,
якая праходзіла ў Рыме. Святы Айцец нагадаў, што Фонд быў створаны бл. Янам Паўлам
II 20 гадоў таму для пашырэння і рэалізацыі каталіцкага сацыяльнага навучання. І за
гэтыя гады шмат было зроблена, адзначыў Пантыфік, перш за ўсё праз свецкіх людзей,
якія працуюць у грамадскай, палітычнай і эканамічнай сферах. Францішак звярнуўся да
тэмы сёлетняй сустрэчы Фонду, якая запрашае “пераасэнсаваць салідарнасць”. На яго
думку, гэта азначае дзве рэчы: па-першае, аб’яднаць навучанне з сацыяльна-эканамічным
развіццём, а па-другое, глыбока асэнсаваць глыбокую каштоўнасць салідарнасці, якая
грунтуецца на Евангеллі. Цяперашні эканамічны і сацыяльны крызіс дадае актуальнасці
гэтаму “пераасэнсаванню” і падкрэслівае праўдзіваць і актуальнасць сацыяльнага навучання
Касцёла, заўважыў Пантыфік.
Масы беспрацоўных або часткова занятых і незлічонае
мноства галодных сведчыць аб тым, што “нешта не працуе”, - падкрэсліў Святы Айцец
і дадаў, што беспрацоўе распаўсюджваецца па свеце як лясны пажар. Няма нічога горшага
за матэрыяльную беднасць, якая звязана з немагчымасцю зарабляць на жыццё і пазбаўляе
працу годнасці. Таму, на думку Папы, сёння ўжо стаіць пытанне не толькі аб “пераасэнсаванні
салідарнасці”, але “глабальным пераасэнсаванні ўсёй сістэмы”, яе рэфармаванні і выпраўленні
ў адпаведнасці з асноўнымі правамі чалавека.
На заканчэнне сваёй прамовы да
членаў Фонду Пантыфік зноў звярнуўся да тэмы крысізу і адзначыў, што яго карані ляжаць
у антрапалагічным і этычным крызісе, бо ідалы ўлады, прыбытку, грошай, перабольшанага
ўзвышэння значэння чалавечай асобы, сталі асноўнай нормай і вырашальным крытэрыем
арганізацыі. Пры гэтым забываецца, што вышэй за адносіны, логіку і рынак, стаіць чалавек
і яго годнасць, заўважыў Францішак. Ён падзякаваў за працу, якую робіць фонд “Centesimus
Annus Pro Pontifice” для таго, каб свет зразумеў гэта.