СДМ 2013: Крыжовы шлях з сімфанічным аркестрам і ды-джэямі
Любоў, жыццё, інваліднасць,
хваробы, турмы, сацыяльныя сеткі, рэлігійнасць, наркотыкі: гэта толькі некаторыя з
тэм разважанняў Крыжовага шляху, які адбудзецца ў рамках Сусветных дзён моладзі ў
Рыа-дэ-Жанейра. Спецыяльна для набажэнства, якое пройдзе 26 ліпеня на ўзбярэжжы Кокакабана,
арганізатары падрыхтуюць стацыі ў стылі XVI ст. – часу, калі распаўсюдзілася традыцыя
правядзення Крыжовага шляху. Пра гэта, агенцтву “SIR” расказаў мастацкі дырэктар Сусветных
дзён моладзі Уліс Крус. Ён паінфармаваў, што папа Францішак будзе ўдзельнічаць у набажэнстве,
назіраючы за ім са спецыяльна збудаванага памосту. На ім, акрамя Пантыфіка, размесцяцца
каля 1500 чалавек, у тым ліку 20 асоб з абмежаванымі магчымасцямі.
Назвы стацый
будуць чытацца двойчы – спачатку ўздоўж маршруту Крыжовага шляху, там, дзе будуць
знаходзіцца пілігрымы, а затым у месцы знаходжання Пантыфіка. Назіраць за прамой трансляцыяй
Крыжовага шляху можна будзе праз вялікія экраны, усталяваныя ў розных частках Рыа-дэ-Жанейра.
Музычнае суправаджэнне набажэнства забяспечаць сімфанічны аркестр, музычны гурт і
некалькі ды-джэяў. У набажэнстве будзе задзейнічана каля 500 чалавек, адбор якіх працягваецца
да гэтага часу.