ԴԱՄԱՍԿՈՍ, ԹԵԼ ԱՒԻՒ, «Էյ. Փի.».- Սուրիական բանակը հաղորդագրութիւն մը հրապարակելով՝
տեղեկացուց, թէ Երեքշաբթի, Մայիս 21ին, իսրայէլեան ռազմական ինքնաշարժ մը մուտք գործած
է Կոլանի սուրիական բաժինը, որուն հետեւանքով սուրիական բանակը կրակ բացած է անոր վրայ՝
ծանր վնասներ հասցնելով: Իսրայէլեան բանակը հակադարձած է՝ երկու հրթիռներ արձակելով սուրիական
բանակային դիրքին վրայ. անոնք միայն նիւթական վնասներ պատճառած են: Իսրայէլեան բանակի
բանբերը հաստատեց այս լուրը, սակայն շեշտեց, թէ ոչ ոք վիրաւորուած է, իսկ Իսրայէլ սպառնացած
է այս յարձակումին դիմաց «լուռ չմնալ»: Իր կարգին, Սուրիոյ տեղեկատուութեան նախարարի
օգնական Խալաֆ Մֆթահ լիբանանեան «Մանար» պատկերասփիւռի կայանին յայտնեց, թէ Սուրիոյ մէջ
հաստատուած են Իսրայէլի ուղղուած զէնքեր, «որոնք տակաւին չօգտագործուեցան»: Քաղաքական
գետնի վրայ, Ռուսիոյ արտաքին գործոց նախարար Սերկէյ Լաւրով յայտնեց, որ Սուրիոյ շուրջ
առաջարկուած միջազգային խորհրդաժողովին «պէտք է զգուշութեամբ պատրաստուիլ»: Ան նշեց,
որ Միացեալ Նահանգներու արտաքին գործոց նախարար Ճան Քերիի հետ համաձայնած է այս կէտին
շուրջ՝ աւելցնելով, թէ խորհրդաժողովին պէտք է մասնակցին սուրիական ընդդիմութեան բոլոր
կողմերը, ներառեալ՝ Սուրիայէն դուրս գործող ընդդիմութիւնը: Ան նաեւ ըսաւ, որ խորհրդաժողովին
Իրանի մասնակցութիւնը կարեւոր է՝ նկատի ունենալով, որ անիկա շրջանային զարգացումներուն
վրայ մեծ ազդեցութիւն ունեցող երկիր մըն է: Լաւրով յիշեցուց, որ Յունիս 30, 2012ին
գոյացած Ժընեւի համաձայնութիւնը, որ հիմքը կը կազմէ Սուրիոյ շուրջ միջազգային խորհրդաժողովին,
սուրիական պետութեան կառոյցներու պահպանումը կ՛ապահովէ փոխանցման հանգրուանին: Միւս
կողմէ, Յորդանան յայտնեց, որ սուրիական ընդդիմութիւնը բացակայ պիտի չըլլայ Մայիս 22ին
Ամմանի մէջ գումարուելիք «Սուրիոյ բարեկամներ»ու ժողովէն՝ հերքելով այդ մասին տարաձայնութիւնները
եւ վստահեցնելով, որ ընդդիմութիւնը «պատշաճ ներկայացուցչութիւն պիտի ունենայ»: