Egjipt: përsëri sulme kundër bashkësisë kopto-ortodokse; u vihet flaka dy kishave.
Bashkësia kopto-ortodokse egjiptiane po përballon një sulm të ri nga ana e islamistëve.
Më 17 majin e kaluar, në zonën e Dakhelës, në perëndim të Aleksandrisë e në Menpal,
dy kisha u sulmuan me bomba molotov. Në Aleksandri, një grup prej 20 mijë myslimanësh
sulmoi Kishën e Shën Marisë, duke djegur hyrjen e ndërtesës e duke thyer të gjithë
xhamat. Gjatë sulmit, një besimtar humbi jetën për shkak të një goditjeje në zemër.
Koptët e krishterë iu përgjigjen kësaj dhune të re, duke dalë nga banesat e tyre e
duke formuar një mur njerëzor rreth kishës. Sipas dëshmitarëve, disa islamistë, të
armatosur me pushkë e pistoleta, nisën të qëllojnë mbi murin njerëzor pa asnjë mbrojtje.
Në zanafillë të ndeshjeve, njofton agjencia AziaNjuz, ishte grindja ndërmjet dy familjeve,
njëra e krishterë, tjetra myslimane. Episode të tilla po bëhen gjithnjë më të shpeshta.
Forcat e policisë po kërkojnë disa të rinj myslimanë, për t’i arrestuar, ndërsa besimtarët
e vërtetë të të dyja palëve përpiqen me të gjitha forcat të ngjallin frymën e dialogut,
të pajtimit e të paqes. AziaNjuz kujton se episode të tilla, në rend të ditës, të
injoruara nga policia, vijojnë të mbjellin vdekje e shkatërrime. Episodi më i rëndë
ishte ai, që ndodhi para katedrales së Shën Markut, në Kairo, ku grupe islamistësh
sulmuan me gurë e me bomba molotov, funeralin e katër të krishterëve koptë, vrarë
gjatë ndeshjeve të 5 prillit të kaluar. Pasojat: 2 të vdekur, 80 të plagosur e kisha
në flakë.