Папа да свецкіх рухаў: не забывайце пра годнасць чалавека і яго працы
Касцёл не з’яўляецца
палітычным рухам ці добра арганізаванаю структураю, гэта не па-за ўрадавая арганізацыя,
бо калі б быў такім страціў бы сваю натуру, сказаў папа Францішак да ўдзельнікаў малітоўнага
чування, якое адбылося на плошчы св. Пятра ў суботу 18 мая. У ім прыняло ўдзел больш
за 200 тыс. прадстаўнікоў са 150 рухаў і касцельных супольнасцяў з розных краін свету,
у тым ліку і з Беларусі. Мерапрыемства адбылося ў вігілію Спаслання Духа Святога на
знак прысутнасці Духа Хрыста Увасрослага, які кіруе сваім Касцёлам і евангелізацыйнай
справай. Падчас сустрэчы Папа адказаў на некаторыя пытанні, якія тычыліся евангелізацыйнай
дзейнасці Касцёла, яго ўбоства і пераследавання хрысціян. “Мы з’яўляецмся сапраўднымі
евангелізатарамі не тады, калі мы самі апрацоўваем стратэгіі дзейнасці, але тады,
калі дазваляем Езусу, каб узяў нас за руку і кіраваў намі”, - адзначыў Пантыфік і
дадаў, што наша дзейнасць без малітвы не мае ніякага сэнсу.
Францішак падкрэсліў,
што ўбоства не з’яўляецца ідэалагічнай, але тэалагічнай катэгорыяй, якая паказвае
на ўбоства Цела Хрыста. ”Цяперашні крызіс нішчыць чалавека і робіць шмат зла для ўсяго
чалавецтва . Наша мужнасць павінна паштурхоўваць нас бачыць Хрыста ў апошніх”, - сказаў
Папа. Паводле яго зараз людзі стаюцца менш важнымі за рэчы, якія даюць прыбытак тым,
хто мае палітычную, фінансавую і эканамічную ўладу. “Мы дайшлі да таго, што забыліся
пра годнасць чалавечай асобы і працы, і гэта з’яўляецца сучасным крызісам”, - адзначыў
Святы Айцец і дадаў, што наша цывілізацыя страціла над сабой кантроль і замест спрыяць
таму, каб чалавек быў шчаслівы, мы дайшлі да культуры адмовы: таго, хто нас не задавальняе
мы адкідаем.
Папа чарговы раз нагадаў, што сёння ў свеце больш мучанікаў за
веру чым было іх ў першых гадах хрысціянства. “Мучаніцтва гэта не параза, гэта вышэйшая
форма сведчання. Ці мы молімся за тых, хто церпіць і якіх пераследуюць?”, - запытаўся
Пантыфік. Ён адзначыў, што кожны чалавек павінен быць свабодным у вызнаванні сваёй
веры, бо з’яўляецца Божым дзіцём.
Падчас мерапрыемства сваімі асабістымі досведамі
сустрэчы з Хрыстом падзяліліся, між іншым, ірландскі пісьменнік і журналіст Джон Вальтэр
і пакістанскі ўрач Пол Бхаці, дарадчык прэм’ер-міністра гэтай краіны па пытаннях нацыянальнай
гармоніі. Першы расказаў прысутным аб сваім пошуку ў маладосці свабоды, што прывяло
яго да алкагалізму. “Дзякуючы сябрам я адкрыў, што задавальнення не даюць дробныя
радасці, але адкрыццё Бога, крыніцы асабістай праўды. Пазнанне Хрыста- гэта пазнанне
самога сябе”, - сказаў Джон Вальтэр.
Пол Бхаці расказаў аб глыбокай веры свайго
брата Шабхаза, былога міністра па справах меншасці, забітага ісламістамі ў 2011 г.
Ён запэўніў усіх прысутных, што вера брата аказала вялікі ўплыў на паслядоўнікаў іншых
рэлігій ў яго краіне.
Сустрэча Папы з членамі рухаў і касцельных супольнасцяў
завершылася сумесным вызнаннем веры.