«Սուրիոյ Կը Մատակարարենք Հակաօդային Պաշտպանութեան Զէնքեր, Որոնք Շրջանի Հաւասարակշռութեան
Որեւէ Խախտում Պիտի Չպատճառեն» Ըսաւ Լաւրով
ՄԱԿ-ի ընդհանուր քարտուղար Պան Քի Մուն երէկ Ռուսիոյ մէջ հանդիպում ունեցաւ Ռուսիոյ արտաքին
գործոց նախարար Սերկէյ Լաւրովի հետ: Հանդիպումէն ետք տրուած մամլոյ ասուլիսի մը ընթացքին
Լաւրով յայտարարեց, որ հանդիպումին ընթացքին քննարկուած են Սուրիոյ կացութիւնը եւ տագնապի
լուծման կարելիութիւնները` շեշտելով, որ անհրաժեշտ է «Սուրիան միացեալ ու գերիշխանութեան
տէր պահել, ինչպէս նաեւ տագնապի լուծման համար բոլոր խմբաւորումներուն մասնակցութեամբ
սուրիական ներքին երկխօսութիւն մը պէտք է կատարուի»: Ան շեշտեց, որ «Սուրիոյ շուրջ
միջազգային խորհրդաժողովի մը գումարման առնչութեամբ միջազգային զօրակցութիւն գոյութիւն
ունի»` նշելով, որ Սուրիոյ մէջ լուծման հիմքը պէտք է հիմնուած ըլլայ Ժընեւի խորհրդաժողովի
արդիւնքներուն վրայ: Ռուսական դիւանագիտութեան պետը յայտարարեց, որ «սուրիական տագնապին
շուրջ միջազգային խորհրդաժողովին պէտք է մասնակցին Սուրիոյ բոլոր դրացիները, որոնց շարքին`
Սէուտական Արաբիան եւ Իրանը»` նշելով, որ իր երկիրը «աջակցած է քիմիական զէնքերու օգտագործման
դէպքին շուրջ ՄԱԿ-ի կողմէ հետաքննութեան սուրիական կառավարութեան դիմումին»: Լաւրով
հարցումի մը պատասխանելով ընդգծեց, որ «Սուրիոյ կը մատակարարենք հակաօդային պաշտպանութեան
զէնքեր, որոնք շրջանին մէջ հաւասարակշռութեան որեւէ խախտում պիտի չպատճառեն»: Ան նշեց,
որ «աշխարհի մէջ խնդիրները չեն նուազիր, սակայն անոնք պէտք է լուծուին ՄԱԿ-ի կեդրոնական
դերակատարութեամբ»: Քի Մուն իր կարգին նշեց, որ Լաւրովի հետ իր հանդիպումը «արդիւնաւէտ
էր»: Ան մտահոգութիւն յայտնեց Սուրիոյ մէջ բռնարարքներու մագլցումին առնչութեամբ` աւելցնելով,
որ պէտք է այդ բռնարարքները կասեցնել բանակցութիւններու ճամբով եւ պէտք է փոխադարձ համաձայնեցուած
լուծում մը գտնել: «Սուրիական տագնապը ամբողջ շրջանին վրայ կ՛ազդէ` յատկապէս Լիբանանին
եւ Յորդանանին», ըսաւ ան` աւելցնելով, որ «Սուրիոյ մէջ խաղաղութեան հաստատման Ժընեւի
խորհրդաժողովի գումարման կարեւորութեան շուրջ համաձայնութիւն գոյացուցինք»: Քի Մուն
ըսաւ, որ «Ռուսիա մեր դիմագրաւած բարդ հարցերուն լուծման համար քաղաքական կամք կը ցուցաբերէ»:
Ան նշեց, որ նախարարներու միջեւ հանդիպումներ տեղի կ՛ունենան Ժընեւի խորհրդաժողովին թուականը
ճշդելու համար` աւելցնելով, որ «մեծ ջանքեր կը թափենք թուականի ճշդումին համար»: ՄԱԿ-ի
ընդհանուր քարտուղարը յայտնեց, որ Սուրիոյ մէջ քիմիական զէնքի օգտագործման հետաքննիչ
յանձնախումբի այցելութեան կարելիութիւնը պէտք է ապահովուի: