Papa Françesku bisedon me Angela Merkel: bota ka nevojë për një Evropë të fortë e
të drejtë.
Sot paradite Papa priti, në Pallatin Apostolik, në Vatikan, kancelaren federale të
Gjermanisë, Zonjën Angela Merkel, e cila më pas u takua edhe me imzot Dominik Mambertì,
Sekretar për Marrëdhëniet me Shtetet.“Gjatë bisedimeve të përzemërta, njofton një
komunikatë e Sallës vatikanase të Shtypit, u kujtua historia e gjatë e marrëdhënieve
që lidhin Selinë e Shenjtë me Gjermaninë, duke u ndaluar tek temat me interes të përbashkët,
si situata shoqërore e politike, ekonomike e fetare në Evropë e në botë. Në mënyrë
të posaçme u fol për mbrojtjen e të drejtave të njeriut, persekutimet kundër të
krishterëve, lirinë fetare dhe bashkëpunimin ndërkombëtar për sigurimin e paqes. Nuk
mungoi edhe shkëmbimi i mendimeve mbi Evropën, si Bashkësi vlerash e mbi përgjegjësinë
e saj në botë, përfundon komunikata, duke uruar që të gjitha forcat civile e fetare
të impenjohen në favor të zhvillimit, të bazuar mbi dinjitetin e njeriut e të frymëzuar
nga parimet e ndihmës e të solidaritetit”.