Thirrje autoriteteve civile, që të respektohet e drejta e besimtarëve për ta jetuar
lirisht fenë e tyre si dhe ftesë, drejtuar të gjithë evropianëve, që të jenë të vetëdijshëm
për rolin e krishterimit në Kontinent”. Këtë përmbajtje ka mesazhi i Papës Françesku
drejtuar dy delegacioneve përfaqësuese të Kishës ortodokse e asaj katolike të Kontinentit
evropian, sot në Stamboll për një seminar studimesh, titulluar “Liria fetare në ditët
tona. Edikti i Milanos i Perandorit Kostandin: 1700 vjet më pas”. Takimi organizohet
nga Patriarkana ekumenike e Kostandinopojës, në bashkëpunim me Këshillin e konferencave
ipeshkvnore evropiane (Ccee). Përmes një mesazhi të sekretarit të Shtetit të Shenjëtërisë
së Tij, kardinalit Tarçizio Bertone, Papa Françesku i bën urimet më të mira vëllazërore
Shenjtërisë së Tij, Bartolomeu, kryepeshkop i qytetit të themeluar nga vetë Kostandini
i Madh, me shpresën se së shpejti do të vijë dita kur përçarjet e mijëvjeçarit të
dytë do t’i kalojnë përgjithnjë kujtesës të së kaluarës. Lidhur me temën e seminarit,
Papa Françesku u kujton autoriteteve civile se duhet ta respektojnë kudo, në dritën
e Dekretit historik të Kostandinit, të drejtën e besimtarëve për ta jetuar lirisht
kultin e tyre dhe për ta shprehur publikisht fenë, në të cilën besojnë. Njëkohësisht,
vijon mesazhi, Papa i fton të gjithë qytetarët evropianë ta njohin rolin e krishterimit
në formimin e kulturës sonë e të mos e harrojnë kontributin e vazhdueshëm, që mund
të japin të krishterët në këtë drejtim. Duke hapur punimet e seminarit, sot paradite,
në Stamboll, Patriku ekumenik i Kostandinopojës, Bartolomeu I, pohoi me forcë se Kisha
jeton, se Kisha nuk është zhdukur nga jeta publike. Kisha është e gjallë e vijon t’i
vadisë, me Ungjillin e Krishtit e me gjakun e martirëve të saj, në të katër anët e
botës, shoqërinë dhe institucionet. I vadit edhe e sidomos kur jeton në katakombe,
kur vuan, kur trajtohet mizorisht, kur persekutohet, deri në martirizim. Sot paradite,
pas fjalimeve të metropolitit Emmanuel të Francës dhe kardinalit Peter Erdë, kryetar
i Këshillit të konferencave ipeshkvnore evropiane (Ccee), me ndihmën e specialistëve
të pranishëm në takim, pjesëmarrësit prekën temën e lirisë fetare, duke u nisur nga
tri perspektiva: liria fetare në këndvështrimin e bashkësive fetare: bashkësisë
hebraike, myslimane, ortodokse e katolike; liria fetare sot në botë dhe marrëdhëniet
ndërmjet feve, politikës e shoqërisë. Në përshëndetjen e rastit, Patriku, që mbërrijti
dje në Stamboll, pas tri ditësh të ngarkuara me takime e lutje në Milano, nënvizoi
se “Fryma e Ungjillit dhe krishterimi janë e vetmja mënyrë, për të siguruar përparimin
e për të mbrojtur paqen”.