Հայաստանի Մէջ Մանկական Նոր Հիւանդանոցի Մը Կառուցումը։
Երեւան- Հայաստանի առողջապահութեան նախարար Դերենիկ Դումանեան ընդունած
է Հռոմի ՜՜Թոր Վերկատա՝՝ բժշկական համալսարանի նախագահ Ռենատօ Լաուրոյի ղեկավարած պատուիրակութիւնը,
որ Հայաստան կը գտնուի բարեսիրական առաքելութեամբ (կը հաղորդագրէ Արմէնփրէս լրատու գործակալութիւնը։
Ողջունելով հիւրերը՝ Հայաստանի առողջապահութեան նախարարը՝ Դերենիկ Դումանեան կարեւոր
նկատած է նման հեղինակաւոր հաստատութեան ներկայացուցիչներուն Հայաստան տուած այցելութիւնը,
եւ անոնց առաքելութեան կարեւորութիւնը, որ է մանկական հիւանդանոց ստեղծելու ծրագիրը։
Իր կարգին ՜՜Թոր Վերկատա՝՝ բժշկական համալսարանի նախագահը՝ Ռենատօ Լաուրօ յայտնած է,
որ իրենց այս ծրագիրը ծնունդ առած է Իտալիոյ մէջ Հայաստանի Հանրապետութեան նախկին դեսպան
Ռուբէն Կարապետեանի հետ կայացած շարք մը հանդիպումներու ընթացքին կատարուած խորհրդակցութիւններու
լոյսին տակ: Աւելի՛ն, այս ծրագիրի առնչութեամբ եռակողմ համաձայնագիր կնքած են ՜՜Թոր Վերկատա՝՝
համալսարանի նախագահը, ՜՜Դադիվանք՝՝ հիմնադրամի նախագահ Ռուբէն Կարապետեանը եւ ՜՜Անաստասիս՝՝
ընկերակցութեան նախագահ Ռիքարտօ Աքուիլան: Անդրադառնալով այն երեւոյթին, թէ ինչո՛ւ որոշուած
է նման հիւանդանոց մը կառուցել Հայաստանի մէջ՝ Լաուրօ նշած է, որ նկատի առնուած է երկու
երկիրներու երկարամեայ բարեկամութիւնը, Հայաստանի ՜՜ քրիստոնէութեան օրրան՝՝ ըլլալը,
ինչպէս նաեւ այն, որ հայերը շատ բան տուած են Եւրոպային ու մասնաւորապէս Իտալիոյ: ՜՜Այսօր
-ըսած է ան- Հռոմի մէջ աշխատող հազարէ աւելի բժիշկներէն շատեր յաջողած են իրենց ասպարէզին
մէջ, նաեւ ոմանք արդէն ճանչուած մասնագէտներ են՝՝: Պատուիրակութեան անդամները ընդգծած
են, որ Հայաստանի մէջ կայացած հանդիպումներուն ընթացքին եւս շեշտը կը դրուի արհեստավարժութեան
եւ բարձր կարողութիւններուն վրայ: Անոնք Դերենիկ Դումանեանին յայտնած են, որ Երեւանի
մէջ մանկական հիւանդանոցի կառուցման վայրը յստակեցնելէ քանի մը ամիս ետք արդէն իսկ ձեռնամուխ
պիտի ըլլան միջոցներու հայթայթման: Հիւրերը նախարարին վստահեցուցած են, որ այս ծրագիրը
համագործակցութեան նոր հեռանկարներ պիտի բանայ եւ բազմաբնոյթ այլ ծրագիրներու սկիզբ պիտի
ըլլայ։ Հայաստանի առողջապահութեան նախարարը շնորհակալութիւն յայտնած է իտալացի գործընկերներուն՝
Հայաստանին համար բաւական օգտակար ծրագիրն ու հետագայ նախագիծերը մանրամասնօրէն ներկայացնելնուն
համար: Ան հիւրերուն ներկայացուցած է Հայաստանի մէջ կառավարութեան կողմէ առողջապահութեան
ոլորտին մէջ իրականացուող ծրագիրները, որոնց կարգին՝ մարզերուն մէջ ժամանակակից հիւանդանոցներ
կառուցելու շարունակականութեան, ուռուցքաբանութեան զարգացման, համակարգի առաջնակարգ բաժանմունքները
կրթական նպատակներով որպէս բժշկական համալսարանական կեդրոններ տրամադրելու վերաբերեալ: Իտալական
պատուիրակութիւնը՝ հետաքրքրութիւն ցուցաբերելով ոսկրածուծի փոխպատուաստման հեռանկարին
նկատմամբ, պատրաստակամութիւն յայտնած է յառաջիկային համագործակցիլ այդ, ինչպէս նաեւ դեղագործութեան
ոլորտին մէջ: «Հիւանդանոցը, որ պիտի կառուցուի մեր կողմէ, պէտք չէ մրցի ձեր միւս բժշկական
կեդրոններուն հետ: Սակայն մենք այդ կեդրոնին նկատմամբ աջակցութիւն պիտի ցուցաբերենք,
եւ ժամանակի ընթացքին անիկա իր դրական ազդեցութիւնը պիտի ունենայ մանկաբուժութեան յառաջընթացին
վրայ: Պարոն Բաբլոյեանի հետ մեր ունեցած հանդիպումներուն ընթացքին գիտակցեցանք, որ այս
երկրին մէջ հիմք կայ այդ մէկը ընելու», յայտնած է Լաուրօն: Նախարար Դումանեանը հայ
ժողովուրդին եւ Հայաստանի կառավարութեան անունով շնորհակալութիւն յայտնած է Իտալիոյ կառավարութեան
եւ ժողովուրդին՝ նման աջակցութեան համար: Հանդիպումին մասնակցած է նաեւ՝ Հայաստանի
Ազգային ժողովի առողջապահութեան, մայրութեան եւ մանկութեան հարցերու մնայուն յանձնաժողովի
նախագահ Արա Բաբլոյեանը: