Барталамей І: мы павінны пераадолець цяжкасці на дарозе экуменізма
Патрыярх Канстантынопальскі
спадзяецца, што яго сумесная з папам Францішкам пілігрымка ў Іерусалім сапраўды адбудзецца.
Яна запланавана на студзень 2014г. У інтэрв’ю парталу “Vatican Insider” праваслаўны
іерарх адзначыў, што, будучы у Ватыкане з нагоды інаўгурацыі цяперашняга пантыфікату,
ён запрасіў Папу разам наведаць Святую Зямлю. Паводле яго, гэта добрая нагода адзначыць
50-ю гадавіну гістрыячнай сустрэчы ў Іерусаліме паміж Паўлам VI і Патрыярхам Афінагорам
у студзені 1964 г., вынікам якой стала зняцце ўзаемных экскамунік, накладзеных падчас
Вялікай схізмы 1054 года. Барталамей І станоўча адзначыў і назваў вельмі важнымі
для экуменічнага дыялогу першыя крокі, зробленыя Пантыфікам. Тое, што Францішак называе
сябе перш за ўсё Біскупам Рыма, можа адыграць важную ролю ў дыялогу паміж двума Цэрквамі,
лічыць Патрыярх. Ён адзначыў станоўчую рэакцыю, якую выклікала ў праваслаўным свеце
прызначэнне Папам кансультацыйнай рады з васьмі кардыналаў. “Гэта выбар, які сведчыць
аб калегіяльнасці, што так характэрна для нашай Царквы”, - сказаў Барталамей І.
Патрыярх
Канстантынопальскі перакананы, што праваслаўныя і католікі маюць шмат нагод, каб дэманстраваць
перад светам сваю добрую волю і жаданне ісці наперад у экуменічным дыялогу. “Існуюць
цяжкасці, у тым ліку і ўнутры праваслаўнага свету, але мы павінны іх пераадолець,
каб працягваць у тым ліку і тэалагічны дыялог”, - адзначыў Барталамей І.
Прадстаяцель
заканчвае свой візіт у Мілан. Тут 16 мая разам з кардыналам Анджэла Сколай ён узначаліць
экуменічнае набажэнства ў базыліцы св. Амброзія Медыяланскага. Падчас візіту Патрыярха
суправаджае сакратар Папскай рады спрыяння хрысціянскаму адзінству біскуп Браян Фарэл.