Papa: etika u jep bezdi adhuruesve të parasë, por të mos e ndash pasurinë me të varfërit,
do të thotë t’i zhvatësh
Të pasurit bëhen gjithnjë e më të pasur, ndërsa shumica varfërohet: ky ishte denoncimi
i Papës Françesku në fjalimin, që u mbajti ambasadorëve jo rezidentë pranë Selisë
së Shenjtë, që paraqitën sot letrat kredenciale në Vatikan. Janë nga Kirgizistani,
Antigua e Barbuda, Dukati i Madh i Luksemburgut dhe Botsvana. Kërkesat e njeriut,
nënvizoi Papa, janë reduktuar në një: konsumi: “Vetë njeriu konsiderohet si
mall për konsum, që mund të përdoret e pastaj të hidhet. Kemi hyrë në kulturën e mbeturinave”. Është
kultura e atyre, që promovojnë autonominë absolute të tregut dhe spekullimin financiar.
Ati i Shenjtë denoncoi me forcë korrupsionin kapilar, mospagimin egoist të taksave,
shtimin e borxhit publik e largimin nga ekonomia reale. Papa Françesku foli për një
dëshirë pa kufi për pushtet e pasuri, duke e krahasuar me adhurimin e viçit të artë
në Bibël. Është mohimi i primatit të njeriut, theksoi më pas. Paraja duhet të shërbejë
e jo të qeverisë: “Pas kësaj sjelljeje fshihet refuzimi i etikës, refuzimi i
Zotit. Njëlloj si solidariteti, etika jep bezdi! Konsiderohet jo prodhuese, pak si
tepër njerëzore… kërcënim, sepse refuzon manipulimin dhe nënshtrimin e personit… Sepse
etika të çon te Zoti, që është jashtë kategorive të tregut… Hyji nuk administrohet,
është madje i rrezikshëm, sepse e nxit njeriun drejt realizimit të plotë e drejt pavarësisë
nga çdo lloj skllavërie”. Papa, tha për veten Horhe Mario Bergolio, i do si
të varfërit, ashtu edhe të pasurit, por e ka për detyrë t’u kujtojë të pasurve se
duhet ta ndihmojnë të varfërin, ta respektojnë e ta promovojnë: “Etika – një
etikë jo ideologjike, natyrisht – mundëson krijimin e një ekuilibri e të një rendi
shoqëror më njerëzor. …inkurajoj ekspertët e financës e qeveritarët e vendeve tona
të marrin parasysh fjalët e shën Gjon Gojartit: Të mos e ndash me të varfërit pasurinë,
do të thotë t’i zhvatësh, t’u marrësh jetën. Ai që zotërojmë, nuk është malli ynë,
por i tyre”. Papa i ftoi të gjithë politikanët t’i luten Zotit t’i frymëzojë
planet e tyre, duke synuar krijimin e një mendësie të re politike dhe ekonomike, për
ta shndërruar dikotominë absolute ndërmjet sferës ekonomike e asaj shoqërore, në bashkëjetesë.