Mesha e imzot Rrok Mirditës në elterin e Gjon Palit II në baziliken e Shën Pjetrit
në Vatikan
Sot më 16 maj, në Bazilikën e Shën Pjetrit në Vatikan, kryeipeshkvi i kryedioqezesë
së Tiranë-Durrës, imzot Rrok Mirdita shtegtoi pranë varrit të të Lumit Gjon Pali II.
Në kapelën e Bazilikës së Vatikanit ku gjendet trupi i të Lumit Wojtila, imzot Mirdita
kremtoi Meshën Shenjtë, në shenjë falënderimi Hyjit për dhuratën e urdhrit ipeshkëvnor,
të cilin e mori, nga duart e të Lumit Wojtila, para 20 vjetësh, në Katedralen e Shkodrës,
gjatë vizitës historike të Papës Gjon Palit II në Shqipëri, më 25 prill 1993. Në
Meshë me kryeipeshkvin imzot Mirdita bashkëkremtuan shumë meshtarë e rregulltarë shqiptarë,
ishte i pranishëm Ambasadori i Shqipërisë pranë Selisë së Shenjtë, Sh.T. zoti Rrok
Logut, Ambasadorë të disa Vende të akredituar pranë Vatikanit, një numër i madh motrash
rregulltarë shqiptare e besimtarë shqiptarë e tjerë disa. Gjatë homelisë së kremtimit
Eukaristik, ipeshkvi i kryeqytetit të Shqipërisë kujtoi Kishën dhe popullin shqiptar
të shumëvuajtur, e pati fjalë të përzemërta e plot emocione, po ja fjalët që tha gjatë
homelisë:
Të dashur vëllezër në episkopat Zotërinj ambasadorë Të dashur
vëllezër në meshtari, rregulltarë e rregulltare Të dashur vëllezër e motra, Më
25 prillin e kaluar kremtuam në Tiranë, 20-vjetorin e vizitës së Papës Gjon Pali II
në Shqipëri. Sot, Zoti na jep hirin për ta kremtuar këtë Eukaristi në elterin, nën
të cilin gjendet urna e Papës së Lum. Jemi në kohën e Pashkëve e na shoqëron posaçërisht
imazhi i Krishtit të ringjallur, Bariu i amshuar që kthehet fitimtar nga ferri, së
bashku me delen e rigjetur, shkëputur nga vdekja e përjetshme e kthyer në jetë. Feja
në Bariun e amshuar na nxit ta mprehim shikimin e të shohim përtej misterit të vdekjes,
lavdinë e të shëlbuarve. Është e lehtë të vërejmë në radhën pa fund të të lumëve,
tiparet e një njeriu të kohës sonë, plotësisht i lidhur me Bariun e amshuar, aq i
lidhur, sa t’i ngjajë krejtësisht: është i Lumi Gjon Pali II. Ta prekësh sot këtë
elter është si të prekësh një copë Parajse. Kjo përvojë bëhet edhe më mallëngjyese
për mua e për disa prej nesh, nëse kujtojmë atë ditë të bekuar të 20 vjetëve më parë,
kur Pasardhësi i Shën Pjetrit shkeli mbi tokën shqiptare, u shtrëngoi duart burrave
e grave në kërkim të shpresës e shqiptoi fjalë ngushëllimi e inkurajimi, fjalë feje
e jete. Atë ditë, bariu i Kishës universale, ardhur në Shqipëri në emër të Bariut
të amshuar, shuguroi katër ipeshkvij, për të qenë barinj të një Kishe, martirizimi
i së cilës nuk kishte të dytë në histori. Dua të kujtoj me këtë rast, në këtë elter,
martirët e Kishës në Shqipëri, si edhe tre ipeshkvijtë që u shuguruan me mua nga Gjon
Pali II e që sot janë në Parajsë. Ndërsa i kujtojmë, u lutemi atyre të kujtohen për
Shqipërinë, për popullin tonë, për Kishën tonë. Udha e këtyre viteve ka qenë e
pasur me fryte, por edhe me vështirësi. Shndërrimi i shpejtë i shoqërisë na vë përpara
sfida të reja, që mund të përballohen vetëm duke e risuar fenë, atë fe, për të cilën
martirët mbeten dëshmitarë të privilegjuar e së cilës, i Lumi Gjon Pali II i shërbeu
deri në fund. Ajo fe, që na bën të vetëdijshëm se ai është Bari i mirë e, se në Kishë
jemi barinj vetëm kur i udhëheqim njerëzit drejt Bariut të vetëm. Në Të na është
dhënë bashkimi e jo jashtë Tij. Bashkimi i Kishës përmendet me forcë nga Jezusi në
Ungjillin e sotëm. Në leximin që dëgjuam, Jezusi i lutet Atit “Që të jenë një gjë
e vetme!”. “Ut unum sint” është edhe motoja ipeshkvnore, që zgjodha 20 vjet më parë.
Uniteti i Kishës është dëshirë e Krishtit e duhet të jetë edhe dëshira jonë. Bashkimi
fillon kur e dëshirojmë atë. Ai nuk është fryt i marrëveshjeve njerëzore, i përkimit
të interesave, i planeve të përbashkëta. Nëse do të ishte kështu, do të ishte shumë
i brishtë. Bashkimi është dhuratë për t’u kërkuar me fe e për t’u pranuar me shpirt
të hapur e me përvujtëri. Nuk jemi ne autorët e bashkimit, por Krishti. Nëse na mungon
bashkimi, do të thotë se na mungon Krishti e një Kishë, së cilës i mungon Krishti,
nuk mund t’i flasë me besueshmëri njeriut. Prandaj mbetet gjithnjë aktuale për Kishën
e për botën, thirrja me të cilën Papa Gjon Pali II përuroi papninë e vet: “Hapjani
portat Krishtit!” Sot, do të doja të luteshim veçanërisht për Shqipërinë, që Kisha
e tokës sonë, barinjtë dhe i gjithë populli t’ia hapin portat Krishtit. Dua t’i lutem
të Lumit Gjon Pali II, së Lumes Nënë Terezë dhe martirëve tanë t’i ndihmojnë nga qielli
laikët në fushën e vështirë të botës, të na dërgojnë thirrje të shenjta për meshtari
e për jetën rregulltare e t’i dhurojnë Kishës sonë barinj e ipeshkvij siç i do zemra
e Zotit. Mbi këtë elter kushtuar njëri prej Pasardhësve të Shën Pjetrit e në këtë
Bazilikë ndërtuar mbi varrin e kryeapostullit, dua të rinovoj dashurinë e Kishës në
Shqipëri për Papën Françesku e ta kujtoj me mirënjohje Papën e nderit Benedikti XVI.
Bashkimi i thellë me Papën është shprehje konkrete e bashkimit në Kishën e Krishtit. Nëna
e Krishtit, kaq e dashur nga i Lumi Gjon Pali II, na ndihmoftë në udhën tonë. Amen. Mesha
e imzot Rrok Mirditës në elterin e Gjon Palit II Bazilika e Shën Pjetrit, 16 maj
2013