Լուքաշենքօ Հայաստանի Մէջ. «Հայ – Պիելոռուսական Յարաբերութիւններու Ապագան Պէտք Է Ներդաշնակ
Ըլլայ Երկիրներու Պատմական Անցեալին» Կ՛ըսէ Նախագահ Սարգսեան
Հայաստանի նախագահ Սերժ Սարգսեանի հրաւէրով պաշտօնական այցելութեամբ Երեւան ժամանեց Պիելոռուսիոյ
նախագահ Ալեքսանտր Լուքաշենքօ: Երէկ տեղի ունեցաւ Պիելոռուսիոյ նախագահին դիմաւորման
պաշտօնական արարողութիւնը, որմէ ետք տեղի ունեցան երկու երկիրներու նախագահներուն դռնփակ
հանդիպումները եւ պաշտօնական պատուիրակութիւններու մասնակցութեամբ ընդլայնուած կազմով
բանակցութիւնները: Հայաստան եւ Պիելոռուսիա կը շարունակեն համագործակցիլ շարք մը մարզերու
մէջ եւ խորացնել առկայ յարաբերութիւնները: Այդ նպատակով կ՛ամրապնդուի երկու պետութիւններուն
իրաւապայմանագրային ենթահողը. Հայաստանի եւ Պիելոռուսիոյ նախագահներ Սերժ Սարգսեանի եւ
Ալեքսանտր Լուքաշենքոյի հանդիպման շրջագիծին մէջ երէկ Երեւանի մէջ համագործակցութեան
զարգացման ու խորացման ուղղուած փաստաթուղթեր ստորագրուեցան: Հանդիպման արդիւնքներուն
վերաբերեալ երկիրներու նախագահները զանգուածային լրատուամիջոցներու ներկայացուցիչներուն
առջեւ յայտարարութիւններ կատարեցին: Սերժ Սարգսեան նշեց, որ Ալեքսանտր Լուքաշենքոյի
հետ հանդիպումները պարբերական բնոյթ կը կրեն եւ անոնք կարելիութիւն կու տան աշխատանքային
օրակարգով քննարկելու հայ-պիելոռուսական երկկողմանի յարաբերութիւններուն առնչուող ընթացիկ
հարցեր: Հայաստանի նախագահը ընդգծեց, որ բարձր մակարդակի երկկողմանի այցելութիւնները
կը մնան յարաբերութիւններու զարգացման գլխաւոր նախապայման եւ Լուքաշենքօ Հայաստանի մէջ
միշտ սպասուած հիւր է: Նախագահ Սերժ Սարգսեան նշեց, որ մէկ ամիսէն պիտի նշուի երկու
երկիրներուն միջեւ դիւանագիտական յարաբերութիւններու հաստատման 20-ամեակը: «Մեր յարաբերութիւններու
ապագան պէտք է ներդաշնակ ըլլայ մեր պատմական անցեալին: Մենք ուս-ուսի պայքարած ենք Հայրենական
պատերազմի ընթացքին», նշեց նախագահ Սարգսեան` աւելցնելով, որ պէտք է պահպանել եւ բազմապատկել
պատմական ժառանգութիւն ստացած յարաբերութիւնները: Նախագահ Սերժ Սարգսեան նաեւ տեղեկացուց,
որ Պիելոռուսիոյ նախագահին հետ քննարկեց շարք մը մարզերու վերաբերող հարցեր, որոնք կ՛առնչուէին
մարդասիրական կապերուն, տնտեսութեան եւ մշակոյթին: Յատուկ ուշադրութիւն յատկացուեցաւ
Հաւաքական անվտանգութեան պայմանագիրի կազմակերպութեան շրջագիծին մէջ համագործակցութեան:
Նախագահ Սարգսեան ներկայացուց նաեւ Լեռնային Ղարաբաղի բանակցային հոլովոյթը եւ շեշտեց,
որ Ղարաբաղի ժողովուրդը խաղաղութիւն կ՛ուզէ, ինչպէս նաեւ ազատ ձեւով զարգանալ իր պատմական
հողին վրայ: Նախագահ Սարգսեան նշեց, որ ղարաբաղեան տագնապի խաղաղ լուծման այլընտրանք
գոյութիւն չունի: Պաշտօնական այցելութեան շրջագիծին մէջ Պիելոռուսիոյ նախագահը այցելեց
նաեւ Ծիծեռնակաբերդի յուշահամալիր` յարգանքի տուրք մատուցելու Հայոց ցեղասպանութեան զոհերու
յիշատակին: Ի պատիւ Պիելոռուսիոյ նախագահ Ալեքսանտր Լուքաշենքոյի եւ անոր գլխաւորած պատուիրակութեան`
նախագահ Սարգսեանի անունով երէկ երեկոյեան տրուեցաւ պաշտօնական ընթրիք: Այսօր Լուքաշենքօ
պիտի այցելէ հայկական հիւլէական ելեկտրոկայան, պիտի մասնակցի նաեւ Երեւանի մէջ հայ-պիելոռուսական
առեւտուրի տան բացման արարողութեան: Նոյն օրը Հայաստանի եւ Պիելոռուսիոյ նախագահները
ներկայ պիտի գտնուին Կոտայքի թեմի Աբովեան քաղաքի Ս. Յովհաննէս Մկրտիչ նորակառոյց եկեղեցւոյ
օծման արարողութեան: