Patriku ekumenik Bartolomeu I me kardinalin Scola kujtojnë Ediktin e Milanos
Patriku ekumenik i Kostandinopojës, Bartolomeu I sot është në Milano ku u prit nga
kardinali Angelo Scola, kryeipeshkëv i kësaj kryedioqeze të lashtë ambroziane. Vizita
historike e Patrikut ekumenik të Kostandinopojës është çasti qendror i nismave të
organizuara nga dioqeza e Milanos për kremtimin e 1700 vjetorit të Ediktit të Milanos
e fillimit të lirisë fetare në Perëndim. Vizita fillimisht qe programuar për 20 e
21 mars e pastaj u shty pas dorëheqjes nga misioni pjetrit paraqitur nga Papa Benedikti
XVI e mbajtja e Konkalvit. Patriku Bartolomeu I gjendet në Milano me ftesë të
kardinalit Scola pas takimit të përzemërt që pati me Papën Françesku më 20 marsin
e kaluar. Patriku Bartolomeu I (Dimitrios Archontonis lindi më 29 shkurt 1940 në ishullin
Imbro në Turqi) është zgjedhur më 22 tetor 1991 nga Sinodi i Shenjtë Kryeipeshkëv
i Kostandinopojës e Patrik ekumenik. Patrikana ka selinë e vet në Stamboll, Bizantin
e lashtë, të cilin më 330 Kostandini e rithemeloi si “Romën e re” e që mori emrin
e Kostandinopojës. Si seli ipeshkëvnore Kostandinopoja qe ngritur në Patrikanë nga
Koncili Kishtar i Efezit në vitin 431 pas Krishtit dhe qe vatër e krishterimit të
lashtë të Lindjes. Patriku ekumenik ka vendin e parë të nderit pranë Kishave Ortodokse:
si primus inter pares ndërmjet Patrikëve lindor është pik referimi e bashkimit të
Kishave ortodokse. “Takimi i Milanos ndërmjet Patrikut Bartolomeut I e kardinalit
Scola në njërën anë kremton përvjetorin historik, por në anën tjetër propozon në realitetin
e sotëm energjitë që në shekullin e IV feja e krishterë pati përhapë e dhënë pa kursim
për të ndihmuar njeriun në kërkimin dhe gjetjen e së mirës së tij e të lumturisë së
tij – njofton në një deklaratë kryedioqeza e Milanos – , prandaj të propozosh besimin
e krishterë në një moment të ndryshimeve kulturore siç jemi duke përjetuar sot, kërkon
prej të krishterëve dijen dhe aftësinë për të nxjerr nga feja jonë energji po aq të
reja e të freskëta për të ndihmuar kurdoherë njeriun në udhën e jetës së tij drejt
lirisë e së vërtetës. Ky takim për ne është shumë i rëndësishëm edhe për faktin e
përbashkët të nderimit që vëllezërit ortodoksë kanë për Kostandinin, të cilit i njohim
mangësisë e mëkatet, por edhe meritën që ka për ndihmën që i dha Krishterimit për
t’u rritur”. E kujtojmë se edhe Konferenca Ipeshkëvnore Katolike e Shqipërisë
ka shënuar 1700-vjetorin e Ediktit të Milano me një simpozium shkencor ndërkombëtar,
organizuar më 27 prill në Tiranë me temë: Kostandini: 1700 Vjetori i Ediktit te Milanos
dhe Liria Fetare”. Mbi vlerën që ka ‘liria fetare’ në shoqërinë shqiptare e marrëdhëniet
ndërmjet bashkësive fetare e Shtetit, të dëgjojmë jezuitinAtë Mario Imperatori,
drejtor i Institutit të Filozofisë e të Teologjisë, profesor i dogmatikës dhe i historisë
së Kishës pranë Seminarit Ndërdioqezan Shqiptar në Shkodër.........