Kardinali Turkson: financa duhet t’i shërbejë së mirës së përbashkët. Në BE, sjellje
nacionaliste prej miopësh
Shtetet dhe organizatat shumëkombëshe duhet të bashkëpunojnë për të krijuar një sistem
financiar, që t’i shërbejë së mirës së përbashkët. Kështu foli kreu i Këshillit Papnor
për Drejtësinë e Paqen, kardinali Peter Turkson në seminarin “Bankat për të mirën
e përbashkët, financa për të mirën e përbashkët”, që u zhvillua këto ditë në Romë.
Bankierë, afaristë dhe ekonomistë e kanë kuptuar tashmë se duhet punuar për një shpërndarje
më të mirë të pasurisë në botë, por nuk janë të gjithë një mendje për mënyrat se si
duhet bërë kjo. Vlera e susidiaritetit,
pra e ndërhyrjes vetëm aty ku ka nevojë, nuk mund të diskutohet, theksoi kardinali
Turkson, i cili vërejti se solidariteti evropian, fatkeqësisht, nuk është më në nivelet
e mëparshme. “Afirmohen – pohoi ai – sjellje nacionaliste prej miopësh, që vënë në
rrezik projektin e Bashkimit Evropian”. E kardinali është edhe kundër planeve të stërmëdha,
të destinuara të dështojnë, pasi nuk marrin parasysh sensibilitetin e njerëzve në
çdo vend. Hapat duhet të jenë të vogla, por të vazhdueshme, nënvizoi kardinali Turkson: “Duhet
të përpiqemi të arrijmë në rrënjët e krizës. Prandaj, sipas nesh, do të ishte ideale
të fillohej me mbikqyrjen e një vendi, të sistemit bankar të tij; pastaj, dalëngadalë,
zgjerohemi e bashkojmë gjithçka. Gjithë përnjëherë është pak e vështirë”. Firmat
e mëdha, u tha në seminar edhe nga eksponentë të tjerë, nuk duhet t’i inkurajojnë
me shpërblime ata drejtues, që i nxisin qëndrimet sipërfaqësore, pa shkuar në thelb
të problemeve, duke përjashtuar kështu, zgjidhjen përfundimtare të tyre. Sipas presidentit
të degës evropiane të Organizatës Ndërkombëtare të Afaristëve të Krishterë, Burkhard
Lefers, duhet vazhduar respektimi i rregullave të rrepta: “Nuk më pëlqen aspak
ç’po bën në këtë moment Komisioni Evropian, i cili u jep afat dyvjeçar për manovrime
Spanjës, Francës dhe vendeve të tjera. Mendoj se duhet të zbatojmë një politikë më
të rreptë e para së gjithash, të sistemojmë financat publike, pavarësisht nga sakrificat
e tensioni shoqëror. Shoh rrezikun e dhënies së dy vjetëve, pastaj të dy vjetëve të
tjera, e kështu me radhë në një proces pa fund. Historikisht, borxhi i qeverive është
rritur gjithnjë”. Nga ana tjetër, ekonomisti italian Luigji Beketi është i
bindur se duhet bërë më shumë për zhvillimin: “Edhe Evropa duhet ta kuptojë
se sot, nuk ekziston rreziku i inflacionit në globalizim, prandaj duhet të ofrojë
më shumë monedhë, që paratë t’u arrijnë drejtpërdrejt familjeve dhe ndërmarrjeve e
jo vetëm bankave”. Objektivi i ekonomisë botërore, ashtu siç pranojnë tani
edhe specialistët, është të ndihmojë të varfërit, të garantojë paqen, të respektojë
ambientin. Tre koncepte, që e nxitën Papën aktual të zgjidhte emrin e Françeskut.