Арцыбіскуп Чэлі: прысутнасць католікаў у сацыяльных сетках не можа быць “фармальнасцю”
Прысутнасць вучняў
Хрыста ў сацыяльных сетках не звязана з прапагандай ці “камерцыйнымі” мэтамі. Тут
гаворка ідзе выключна пра дзяленне з іншымі жыццёвым шляхам, крытэрыямі, якія па-сутнасці
з’яўляюцца скарочаным выразам адносін паміж жыццём і пасланнем Езуса. Такога меркавання
прытрымліваецца арцыбіскуп Клаўдыё Марыя Чэлі, старшыня Папскай рады па сродках масавай
камунікацыі.У інтэрв’ю Ватыканскаму радыё з нагоды Сусветнага дня масавай камунікацыі,
які адзначаўся 12 мая, іерарх падкрэсліў важнасць таго, каб сведчанне веры ў сацыяльных
сетках не было простай “фармальнасцю” – не дастаткова толькі дзяліцца цытатамі з Евангелля.
“Я думаю, што менавіта ў сацыяльных сетках я пакліканы выразіць, як у маім
жыцці сустракаюцца Езус і Евангелле, і як маё жыццё змяняецца. Пасланні, якія кіроўвае
папа Францішак – гэта пасланні такога кшталту: некалькі дзён таму ён казаў, што няма
смутку, меланхоліі для хрысціян, бо іх жыццё звязана з Езусам Хрыстом, ці калі казаў,
што слёзы пакутаў, гэта лінзы, якія дапамагаюць убачыць прысутнасць Езуса. Сацыяльныя
сеткі становяцца момантам дзялення, калі я, у маёй аўтэнтычнасці, камунікацыйнай непасрэднасці,
гавару аб самым галоўным у маім жыцці”, - сказаў ватыканскі іерарх.
Арцыбіскуп
Чэлі звярнуў увагу на тое, што папа Францішак падтрымлівае прысутнасць Касцёла ў інтэрнэце.
Яго ўласныя твіт-паведамленні сталі з’яўляцца часцей і, паводле старшыні Папскай рады
па сродках масавай камунікацыі, “здаецца, ён жадае працягваць ісці ў гэтым накірунку”.