Папа Францішак выказаў
жаданне наведаць Егіпет. Аб гэтым паведаміў Патрыярх Копцкай Праваслаўнай Царквы Тавардас
ІІ пасля сустрэчы з Пантыфікам. Святы Айцец паабяцаў разглядзець магчымасць прыбыць
у паўночна-афрыканскую краіну ў найбольш адпаведны тэрмін. У інтэрв’ю Ватыканскаму
радыё праваслаўны іерарх назваў учарашнюю сустрэчу з Папам “фантастычнай” і выказаў
упэўненасць, што яна паспрыяе добрым адносінам паміж Цэрквамі. Патрыярх, адкрыты на
экуменічную дзейнасць, паведаміў, што менавіта па ініцыятыве яго Царквы ў Егіпце была
створана Рада Цэркваў, у якую увайшлі пяць хрысціянскіх канфесій. “Паміж намі добрыя
адносіны, адбываюцца ўзаемныя візіты, сустрэчы, лекцыі, а ў бліжэйшай будучыні будуць
рэалізаваны некаторыя сумесныя ініцыятывы”, - падзяліўся Тавардас ІІ. Гаворачы аб
важнасці асамблеі, Патрыярх адзначыў, што яна дае магчымасць хрысціянам выказвацца
адзіным голасам не толькі ў краіне, але і на ўсім Блізкім Усходзе. “Гэта для нас вельмі
важна: сумесна працаваць у розных сферах. Гэта таксама важна для нашых людзей, дзе
б яны не знаходзіліся”, - падкрэсліў копцкі іерарх.