Адным з новаўвядзенняў
пантыфікату папы Францішка стала ранішняя св. Імша ў капліцы Дома св. Марты, якую
ён штодзённа цэлебруе ў прысутнасці супрацоўнікаў розных ватыканскіх дыкастэрый і
ўстаноў. У сваіх гаміліях, ужо на працягу амаль двух мясяцаў, Пантыфік разважае пра
вобраз Касцёла, яго ідэнтычнасць і місію. Паводле Папы, Касцёл павінен быць пакорным
і адважным, слухаючым Святога Духа, павінен быць адкрытай супольнасцю любові, а кожны
ахрышчаны мае “вялікую адказнасць” за тое, каб абвяшчаць Хрыста і “весці Касцёл наперад”.
Менавіта пра гэта казаў Святы Айцец падчас Эўхарыстыі 3 мая. “Калі Касцёл губляе адвагу,
у яго ўваходзіць атмасфера “цёпласці”. “Цёплыя” хрысціяне – яны без адвагі... Гэта
вельмі шкодзіць Касцёлу, таму што “цёпласць” цягне назад: паміж намі пачынаюцца праблемы,
мы губляем гарызонты, не маем адвагі ў малітве да Неба і ў абвяшчэнні Евангелля”,
- адзначыў Пантыфік.
Паводле Святога Айца, напоўніцца адвагай можна праз прыняцце
Божага Слова, калі будзем падатлівымі і адкрытымі на дзейнасць Святога Духа. У такім
выпадку Касцёл становіцца супольнасцю, якая з’яўляецца часткай гісторыі любові Хрыста,
звярнуў увагу Папа 24 красавіка ў капліцы Дому св. Марты. “Мы, мужчыны і жанчыны Касцёла,
уключаны ў гэту гісторыю: кожны з нас з’яўляецца звяном у гэтым ланцугу любові. І
калі не разумеем гэтага, то не разумеем нічога аб тым, што такое Касцёл”, - сказаў
ён.
Не засталася без увагі Францішка і тэма рызыкаў у хрысціянкім жыцці. Пра
гэта ён казаў падчас літургіі 30 красавіка. Тут размова ідзе пра жаданне будаваць
Касцёл згодна з нашым уласным уяўленнем. Паводле Пантыфіка, шлях Езуса не мае нічога
супольнага з ідэалогіямі і маралізатарствам, якія фальсіфікуюць Евангелле. Яшчэ адна
рызыка тычыцца пранікнення духа гэтага свету ў Касцёл. “Гэта самая вялікая небяспека!
Калі Касцёл становіцца свецкім, калі мае ўнутры сябе дух свету, калі мае той спакой,
што не ад Бога паходзіць. (…) Касцёл становіцца слабым, Касцёл будзе пераможаны і
няздольны несці Евангелле, пасланне крыжа, правакацыю крыжа”, - сказаў тады Папа.
Адна з галоўных думак Святога Айца, якая прасочваецца ва ўсіх яго гаміліях,
заключаецца ў важнасці ўсведамлення сучасным хрысціянінам таго, што Касцёл, гэта не
бюракратычная ўстанова, але Маці.