Շուրջ 160 Ընտրատարածքներու Ձայները Վերահաշուելու Դիմում
Կեդրոնական ընտրական յանձնախումբի մամլոյ քարտուղար Հերմինէ Յարութիւնեան «Նիուզ.էյ.էմ»-ին
հաղորդեց, որ տարածքային ընտրական յանձնախումբերը Երեւանի բոլոր 13 ընտրատարածքներէն
դիմումներ ստացած են տեղամասային ընտրական յանձնախումբերուն կողմէ` պահանջելով վերահաշուել
աւելի քան 160 ընտրատեղամասերու քուէները: Ըստ անոր, որոշ դիմումներ ներկայացուած
են անձերու կողմէ, որոնք այդ մէկը ընելու օրինական իրաւունք չեն ունեցած: Յարութիւնեան
ընդգծեց, որ այս օրերուն վերահաշուարկ տեղի կ՛ունենայ շարք մը ընտրատեղամասերուն մէջ:
Կեդրոնական ընտրական յանձնախումբի ղեկավարը նշեց, որ քանի մը դիմումներ ստացած են նաեւ
այս կամ այն ընտրատեղամասին մէջ ընտրութիւնները անօրինական ճանչնալու պահանջով: Ան աւելցուց,
որ ստացուած բոլոր դիմումները կը քննարկուին եւ օրէնքին համապատասխան անոնց ընթացք պիտի
տրուի: