Святы Айцец сустрэўся
8 мая з членамі Міжнароднага аб’яднання генеральных настаяцельніц, пасяджэнне якога
3-7 мая праходзіла ў Рыме. Каля 800 законніц з 75 краін размаўлялі на тэму: “Служэнне
ўлады паводле Евангелля”. Пантыфік параўнаў манаскае жыццё да “зыходу” ад сябе. Адбываецца
гэты “зыход”, паводле Папы, для распачацця шляху глыбокай адарацыі і служэння. Менавіта
гэтыя два элементы, на яго думку, непадзельныя ў жыцці касэкраваных асоб. Ажыццяўленне
ўлады Францішак параўнаў да поўнага адмаўлення ад сябе.
Пантыфік нагадаў аб
яшчэ адным элеменце паклікання законніц – паслухмянасці. Яна звязана непасрэдна з
выкананнем Божай волі і адбываецца ў манаскіх супольнасцях праз пасярэдніцтва людзей.
Паводле Святога Айца, паслухмянасць трэба заўсёды разглядаць у кантэксце служэння
Касцёла і рэалізацыі яго функцый. Манаская беднасць, у сваю чаргу, дапамагае пераадолець
любые формы эгаізму і жыць паводле логікі Евангелля, звярнуў увагу Францішак. Нам
непатрэбна “тэарэтычная беднасць”, сказаў ён і заклікаў законніц вучыцца сапраўднай
беднасці, ідучы да самых пакрыўджаных у гэтым свеце. Пантыфік нагадаў, што, абіраючы
“чыстасць для Валадарства Нябеснага”, законніцы дэманструюць сталую свабоду і прыкметы
будучага свету. Ён заўважыў, што кансэкраванае жыццё адзначана “духоўнай плоднасцю”,
а кожная законніца з’яўляецца маці на ўзор Марыі і Маці-Касцёла.
Папа Францішак
нагадаў настаяцельніцам, што “рэальная ўлада на любым узроўні, гэта служэнне, вяршыняй
якога з’яўляецца Крыж. Улада ў вачах Бога заўсёды атаясамліваецца з пакорай і любоўю,
адзначыў Пантыфік. Ён з жалем заўважыў, што Касцёл пакутуе ад кар’ерыстаў, якія “выкарыстоўваюць”
яго як “трамплін” для дасягнення ўласныя інтарэсаў і асабістых амбіцый.
Да
“адчування” з Касцёлам заклікаў Святы Айцец настаяцельніц законных супольнасцяў. Гэта
“адчуванне”, паводле яго, знаходзіць свой выраз у вернасці каталіцкаму навучанню,
зносінах з біскупамі і Наступнікам св. Пятра. Папа заклікаў кіраўніцтва манаскіх супольнасцяў
да клопату аб здаровай дактрыне “у духу Касцёла”. Вяршэнства Хрыста і Яго Евангелля,
улада як служэнне любові і “адчуванне” з Касцёлам і ў Касцёле: тры элементы, на якія,
паводле Пантыфіка, павінны звярнуць увагу сучасныя законніцы.
“Будзьце радасныя,
бо цудоўна ісці за Езусам, цудоўна станавіцца жывой іконай Багародзіцы і нашай святой
іерархічнай Маці-Касцёла”, - сказаў на заканчэнне папа Францішак.
Сёння ў свеце
існуе каля 2 тыс. жаночых манаскіх кангрэгацый, да якіх належыць каля 700 тыс. законніц.