Ամերիկացիները Դէմ Են Սուրիոյ Ներքին Գործերուն Միջամտելուն
Մինչ արեւմուտքը կը քննարկէ Սուրիոյ ընդդիմութեան զէնքով օգնելու տարբերակը, թէժ մարտերը
այդ երկրին մէջ կը շարունակուին: Սուրիոյ ապստամբներու նկատմամբ ԱՄՆ դիրքորոշումը
կարծես թէ կը փոխուի: Պաշտպանութեան նախարար Չաք Հէյկըլ` բրիտանացի գործընկերոջ հետ հանդիպումէն
ետք յայտարարած է, որ Ուաշինկթըն չի բացառեր սուրիական ընդդիմութեան զէնք մատակարարելու
տարբերակը: Պաշտպանութեան նախարարը, սակայն, ընդգծած է, որ Փենթակոն այդ քայլին պիտի
դիմէ այն պարագային, երբ Սուրիոյ մէջ քիմիական զէնքի առկայութեան մասին ծանրակշիռ փաստեր
ստանայ: Առայժմ սուրիացի ապստամբները Ամերիկայէն կը ստանան ոչ ռազմական օգնութիւն`պարէն
եւ դեղորայք: ԱՄՆ քաղաքացիներու շրջանին մէջ իրականացուած հարցումներէն ալ պարզուած է,
որ ամերիկացիներուն մեծ մասը դէմ է երկրի միջամտութեան Սուրիոյ քաղաքացիական պատերազմին:
Մեծ Բրիտանիոյ վարչապետը յայտարարած է, որ չի կրնար զէնք մատակարարել սուրիացի ապստամբներուն,
քանի որ ատոր կը խանգարէ Եւրոմիութեան հաստատած արգելքը, որ կը լրանայ քանի մը շաբաթէն: Մինչ
արեւմուտքը կը քննարկէ Սուրիոյ ընդդիմութեան զէնքով օգնելու տարբերակը, Սուրիոյ մէջ թէժ
մարտերը կը շարունակուին: Տարածաշրջանէն ստացուած վերջին տեղեկութիւններու համաձայն`
երկու պայթում որոտացած է Դամասկոսի միջազգային օդակայանին մէջ: Պայթումներէն ետք դէպքի
վայրին մէջ հրդեհ բռնկած է: Զոհերի ու տուժածների մասին առայժմ տուեալներ չկան: Իսկ Պէյտա
բնակավայրին մէջ կառավարական ուժերը յարձակած են այնտեղ տեղակայուած ապստամբներու վրայ,
որոնցմէ զոհուած է մօտ 100 մարդ, որոնց շարքին` կանայք ու երեխաներ: