Papa Françesku priti në audiencë Presidentin e Libanit. Situata në Siri e gjendja
e të krishterëve ndër temat e takimit.
Sot paradite, në Pallatin Apostolik të Vatikanit, Ati i Shenjtë Françesku priti në
Audiencë Shkëlqesinë e Tij z. Michel Sleiman, President i Republikës së Libanit. Më
pas, Presidenti libanez u takua me Sekretarin e Shtetit të Vatikanit, kardinalin Bertone,
shoqëruar nga Sekretari i Vatikanit për Marrëdhëniet me Shtetet, imzot Mamberti. Gjatë
bisedimeve të përzemërta është folur rreth situatës në Vend, duke nënvizuar rëndësinë
e dialogut e të bashkëpunimit ndërmjet anëtarëve të komuniteteve të ndryshme etnike
e fetare, që përbëjnë shoqërinë e janë pasuri e çmuar, në favor të së mirës së përbashkët,
të zhvillimit e të stabilitetit të Kombit. Lidhur me këtë janë shpreh urimet më të
mira për formimin e Qeverisë së re, që do të duhet të përballet me sfida të rëndësishme
në nivelin kombëtar e atë ndërkombëtar. Në vazhdim të bashkëbisedimeve është folur
edhe mbi situatën rajonale, e në mënyrë të veçantë për Sirinë. Shqetësim të veçantë
krijon edhe numri tejet i madh i refugjatëve sirianë që kanë kërkuar strehim në Liban
e në Vende tjera të afërta, për të cilët si dhe për mbarë popullsinë e shumëvuajtur
siriane, është kërkuar një ndihmë më e madhe humanitare, me mbështetjen e Karitasit
ndërkombëtar. Së fundi, është përmendur edhe situata e të Krishterëve në mbarë
Lindjen e Mesme e kontributin domethënës që ata mund të ofrojnë në dritën e dokumentit
kishtar pas Sinodal “Kisha në Lindje të Mesme”, që përbënë një pik të rëndësishme
referimi për bashkësitë katolike e për shoqërinë e Rajonit.