Çelësi i fjalëve të Kishës: Fjala e Zotit duhet jetuar
Të dashur dëgjues, javës që kaloi e ndërpremë për një çast emisionin tonë, për t’u
lënë vend festimeve për 20-vjetorin e vizitës së Papës së lum Gjon Pali II në Shqipëri.
Sot, rimarrim në dorë komentin, që i bëri Papa Pali VI, “Besojmës” së shqiptuar nga
Sheshi i Shën Pjetrit, në përfundim të Vitit të Fesë, shpallur për të kremtuar 1900-vjetorin
e martirizimit të shën Pjetrit e të shën Palit. Gjatë audiencës së përgjithshme të
së mërkurës, më 3 korrik 1968, Papa Pali VI shpjegoi ç’donte të thoshte me Besojmën
e krishterë, e cila bazohej në “Besojmën” e njohur të Nikesë, me disa shtesa e komente
të Atit të Shenjtë. Kësaj radhe, do t’ju njohim me pjesën ku Papa, pasi ka shtjelluar
Besojmën, vëren: “Pasi njihet Fjala e Zotit, duhet jetuar”: “Ekziston një pasojë
tjetër e Besojmës së Fesë. Është koherenca e jetës me vetë fenë. Nuk është kurrë mjaft,
rëndësia që i japim koherencës ndërmjet fesë e jetës. Nuk mjafton ta njohim Fjalën
e Zotit, duhet ta jetojmë. Ta njohësh, por të mos e zbatosh fenë në jetë, do të ishte
krejtësisht jashtë logjikës, do të ishte përgjegjësi e rëndë. Feja është fillimi i
jetës së mbinatyrshme, e bashkë me të, edhe fillimi i jetës së moralshme. Jeta e krishterë
lind nga feja, gëzon bashkimin embrional që ajo vendos ndërmjet nesh e Zotit, bën
të qarkullojë në ne mendimi i Tij i amshuar e i mistershëm, na përgatit për atë bashkim
jetësor, që lidh ekzistencën tonë të sapokrijuar me Vetjen e pakrijuar e të amshuar,
që është Zoti; por njëkohësisht, fut në mendjen e në veprimet tona një impenjim, një
kriter shpirtëror e moral, një element, që e cilëson sjelljen tonë: na bën të krishterë.
Duhet kujtuar gjithmonë formula e Apostullit: “iustus ex fide vivit”, i krishteri
– mund ta përkthejmë – jeton nga feja (Rom. 1,17; Gal. 3,11; Hebr. 10,38). Pikërisht,
ky aspekt i jetës fetare na intereson tani. Si t’ia përshtasim jetën tonë të përditshme
fesë? Si mund ta përvijojmë tipin modern të besimtarit? Cila është thirrja e fesë,
sot, kur ai dëshiron t’i marrë seriozisht rrjedhojat e Besojmës së vet? Të gjithë
e kujtojmë Koncilin e fundit, që kumtoi se “të gjithë besimtarët, të çfarëdo gjendjeje
e niveli, janë të thirrur në plotësinë e jetës së krishterë e në përsosjen e bamirësisë
e të dashurisë”, e shton: “Edhe në shoqërinë tokësore, nga kjo shenjtëri buron një
nivel më njerëzor jetese” (Lumen gentium, n.40). Ky pohim konciliar mbi thirrjen e
të gjithëve e të secilit për shenjtërim, në përkim me “llojet e detyrat e ndryshme
të jetës” së secilit është me rëndësi themelore: “Secili – vazhdon Koncili – sipas
dhuratave dhe detyrave të veta, duhet të përparojë pa hezitim në udhët e fesë së gjallë,
e cila ndez shpresën e vepron përmes bamirësisë” (ib. N.41). Prandaj, nuk duhet të
ekzistojë i krishteri, që nuk plotëson detyrat për lartimin e vet në birin e Zotit
e vëllain e Krishtit, në anëtarin e Kishës. Mediokriteti, pabesia, inkoherenca, hipokrizia
nuk duhet të bëjnë pjesë në figurën, në tipologjinë e besimtarit modern. Brezi i përshkuar
nga shenjtëria duhet të karakterizojë kohën tonë. Jo vetëm të shkojmë në kërkim të
shenjtit të veçantë e të jashtëzakonshëm, por të krijojmë e të nxisim shenjtërimin
e Popullit, pikërisht siç donte Shën Pjetri, që në agimet e para të krishterimit,
kur shkruante fjalët e njohura: “Ju jeni: ‘Fis i zgjedhur, meshtari mbretërore, komb
i shenjtë, popull që Hyji e fitoi për vete… Ju që dikur nuk ishit Popull e tani jeni
Populli i Hyjit” (1 Petr. 2,9-10)”.