Каштоўнасць чалавечай
працы і важнасць сузірання Хрыста – на гэтыя два аспекты звярнуў увагу папа Францішак
у сваёй катэхезе падчас агульнай аўдыенцыі на плошчы св. Пятра 1 мая. Ён нагадаў,
што ў гэты дзень Касцёл адзначае ўспамін св. Юзафа рамесніка і пачынае месяц традыцыйна
прысвечаны Найсвяцейшай Панне Марыі. Францішак нагадаў, што Езус увайшоў у гісторыю
ў прысутнасці св. Юзафа. Ад яго Ён “вучыўся рамяству цесляра, дзелячы з ім працу,
намаганні, задавальненне, а таксама штодзённыя цяжкасці”. Паводле Святога Айца гэта
падкрэслівае годнасць і важнасць працы. “Праца з’яўляецца часткай Божага плану любові;
мы пакліканы апрацоўваць і бараніць усе даброты стварэння і такім чынам можам удзельнічаць
у справе стварэння. Праца – фундаментальны элемент годнасці чалавека. Праца, калі
прывесці пэўны вобраз, “намашчае” нас годнасцю, дае нам годнасць; робіць падобнымі
на Бога, які працаваў і працуе, дзейнічае заўсёды; дае магчымасць утрымліваць саміх
сябе, уласную сям’ю, спрыяць развіццю ўласнай краіны. І тут я ўзгадваю пра цяжкасці,
якія у многіх краінах, сустракае сёння свет працы і вытворчасці, думаю аб не толькі
маладых беспрацоўных часта з прычыны эканамічнай пазіцыі грамадстваў, якія шукаюць
эгаістычнай выгады, па-за рамкамі параметраў сацыяльнай справядлівасці” - сказаў Францішак.
Пантыфік
заклікаў да салідарнасці і звярнуўся да адказных за функцыянаванне грамадстваў, каб
з новым запалам адказаць на праблему беспрацоўя. “Гэта азначае клапаціцца пра годнасць
чалавека”, - сказаў Папа.
“Я б хацеў асабліва звярнуцца да моладзі: выконвайце
вашы штодзённыя абавязкі, у вучобе, працы, сяброўстве, дапамозе бліжнім; ваша будучыня
залежыць таксама ад таго, як вы здолееце пражыць гэтыя каштоўныя гады вашага жыцця.
Не бойцеся намаганняў, ахвяраў і не глядзіце са страхам у будучыню; трымайце жывой
надзею; заўсёды ёсць святло на гарызонце”, - заклікаў Пантыфік.
Святы Айцец
звярнуў увагу на праблему “рабскай працы”. “Колькі людзей ва ўсім свеце з’яўляюцца
ахвярамі гэтага віду рабства, калі асоба служыць працы, у той час як праца павінны
аказваць служэнне людзям даючы ім годнасць”, - сказаў Папа і заклікаў супрацьстаяць
гэтаму распаўсюджанаму феномену.
Другім пунктам катэхезы папы Францішка было
сузіранне Бога. Пантыфік падкрэсліў, што св. Юзаф, разам з Марыяй, мелі адзіны цэнтр
увагі: Езуса. “Яны суправаджалі і баранілі, з адданасцю і пяшчотнасцю, рост Сына Божага,
які стаў чалавекам для нас, разважаючы над усім, што адбывалася”, - сказаў Папа.
“Каб
слухаць Пана, неабходна навучыцца сузіраць Яго, адчуваць Яго пастаянную прысутнасць
у нашым жыцці; неабходна спыняцца каб паразмаўляць з Ім, даваць месца малітве. Кожны
з нас, таксама і вы хлопцы, дзяўчыны і моладзь (...) павінны спытаць саміх сябе: якое
месца я даю Пану? Ці спыняўся, каб паразмаўляць з Ім? Ад таго часу калі мы былі маленькімі,
нашы бацькі, прывучылі нас пачынаць і заканчаваць дзень малітвай, для таго, каб мы
навучыліся адчуваць, што сяброўства і любоў Бога нас суправаджаюць. Будзем памятаць
больш пра Пана напрацягу нашых дзён!”, - заклікаў Святы Айцец.
Пантыфік падкрэсліў
важнасць і прыгажосць ружанцовай малітвы. Ён нагадаў, што дзякуючы ёй можна разважаць
пра галоўныя моманты жыцця Езуса, каб як для Марыі і Юзафа, Хрыстус стаў у цэнтр нашых
думак, увагі і ўчынкаў. Папа заклікаў маліцца на ружанцы ў сям’і, з сябрамі, у парафіях.
“малітва, якая чыніцца супольна – гэта каштоўны момант для таго, каб умацаваць сямейнае
жыццё і сяброўства. “Будзем вучыцца маліцца больш у сям’і і як сям’я!”, - заклікаў
Францішак.