«Սուրիական Ընդդիմութեան Յաղթանակը Ամբողջ Շրջանին Դէմ Սպառնալիք Մը Պիտի Ըլլայ» Կ՛ըսէ Ահմատիենժատ

Իրանի նախագահ Մահմուտ Ահմատինեժատ Եգիպտոսի նախագահի արտաքին հարցերու խորհրդական Իսամ Հատտատի հետ Թեհրանի մէջ իր ունեցած հանդիպումին ընթացքին զգուշացուց, որ սուրիական ընդդիմութեան յաղթանակը պատճառ պիտի դառնայ անկայունութեան ալիքի մը, որ «ամբողջ շրջանին դէմ սպառնալիք» մը պիտի ըլլայ:
Ան նշեց, որ «խմբակի մը պատերազմի միջոցով իշխանութեան հասնիլը պատերազմի շարունակման եւ երկարատեւ անկայունութեան պիտի յանգեցնէ»` աւելցնելով, որ «Սուրիոյ մէջ անկայունութիւնը շրջանին մէջ այլ երկիրներուն ապահովութիւնը կը վտանգէ եւ ամբողջ շրջանին դէմ սպառնալիք մը պիտի ըլլայ»:
Եգիպտոսի նախագահ Մոհամետ Մուրսիի խորհրդականը Թեհրան կ՛այցելէր Սուրիոյ տագնապին լուծման համար Եգիպտոսէն, Թուրքիայէն, Իրանէն եւ Սէուտական Արաբիայէն բաղկացած կապի խմբակի աշխատանքներուն ծիրին մէջ: «Ալամ» պատկերասփիւռի կայանը երէկ հաղորդեց, որ Իրանի արտաքին գործոց նախարար Ալի Աքպար Սալեհի յայտարարած է, որ Թեհրան պատրաստ է Սուրիոյ շուրջ կապի խմբակի ժողովը հիւրընկալելու:
Ռուսիոյ արտաքին գործոց փոխնախարար Միխայիլ Պոկտանով Լիբանան իր այցելութեան աւարտին Պէյրութի միջազգային օդակայանին մէջ տրուած մամլոյ ասուլիսի մը ընթացքին յայտարարեց, որ ռուսական դեսպանատան մէջ հանդիպում մը ունեցած է սուրիական ընդդիմութենէն Սուրիական համակարգումի յանձնախումբի ընդհանուր քարտուղար Հասան Ապտել Ազիմի գլխաւորութեամբ պատուիրակութեան մը հետ, որ Սուրիայէն յատուկ կերպով եկած էր: Ան նշեց, որ իրենք յանձնախումբը սուրիական ընդդիմութեան մէկ հիմնական մասը կը նկատեն, որովհետեւ անոր Սուրիոյ տագնապի լուծման ծրագիրը կը համընկնի այդ հարցով Ռուսիոյ սկզբունքներուն: