Арцыбіскуп Чэллі: святары павінны быць падрыхтаванымі для знаходжання ў сацсетках
На значэнне сацыяльных
сетак у місіі Касцёла звярнуў увагу старшыня Папскай рады па сродках масавай камунікацыі
напярэдадні 47-га Сусветнага дня сродкаў масавай камунікацыі, які будзе адзначацца
ў нядзелю 12 мая. Арцыбіскуп Клаўдыё Марыя Чэллі падкрэсліў, што прыклад дае сам Папа.
Ён назваў “твіты” Святога Аца “іскрамі ісціны і мудрасці”. “У наш час, калі пашыраецца
духоўная пустэча, цудоўна прыняць гэтыя кароткія, але інтэнсіўныя дары ісціны і прыгажосці”,
- адзначыў іерарх. Ён дадаў, што сацыяльныя сеткі цалкам адпавядаюць логіцы евангелізацыі,
якая з’яўляецца місіяй, не абмежаванай ні часам, ні прасторай, што характэрна і для
сацыяльных інтэрнэт-супольнасцяў. Хрысціяніну, на думку старшыні Папскай рады, тут
трэба проста быць, дзелячыся ведамі, ведучы дыялог, завязваючы новыя адносіны.
На
думку ватыканскага іерарха, важным з’яўляецца знаходжанне святароў у сацыяльных медыя.
Але яны, вядома, павінны захаваць сваю ідэнтычнасць у сетцы і праводзіць душпастырскую
працу. Таму трэба, каб святары былі тэхнічна і прафесійна падрыхтаванымі і кампетэнтнымі
для гэтай місіі, звярнуў увагу старшыня Папскай рады.
Арцыбіскуп Чэллі нагадаў,
што менавіта ІІ Ватыканскі Сабор “адкрыў шлях” да сённяшняга разумення сацыяльнай
камунікацыі ў Касцёле. Саборны дакумент “Inter Mirifica” нейкім чынам прадсказаў не
толькі развіццё тэхналогій, але і змену ладу жыцця людзей. Сёння Касцёл імкнецца ўнесці
свой практычны ўклад у свет СМІ, “імкнучыся ўсё лепш і лепш каардынаваць свае дзеянні”,
- адзначыў арцыбіскуп Чэллі ў інтэрв’ю італьянскай “La Stampa”.
“Збаўчая любоў
Хрыста дасягае чалавека там, дзе ён знаходзіцца, нават у сетцы”, - выказаў перакананне
ватыканскі іерарх. Тым не менш, на яго думку, “чалавек павінен знайсці супольнасць,
якая прыме яго і дапаможа жыць у поўні адносінамі з Хрыстом”.