Кс. Ламбардзі: магчыма, у 2013 г. першая энцыкліка папы Францішка

Бразілія – гэта адзіная краіна, якую ў 2013 г. плануе наведаць папа Францішак. Аб гэтым паінфармаваў кс. Фэдэрыка Ламбардзі, кіраўнік Залы Друку Апостальскай Сталіцы, 25 красавіка. Святар нагадаў, што 23-28 ліпеня Пантыфік прыме ўдзел у Сусветных днях моладзі ў Рыа-дэ-Жанейра. Адначасова, кс. Ламбардзі не выключыў магчымасці апублікавання ў 2013 г. першай энцыклікі Францішка, з улікам таго, што яго папярэднік на Пасадзе св. Пятра, Бэнэдыкт XVI, “напрацаваў матэрыял на тэму веры”. Кіраўнік Залы Друку нагадаў, што напрыканцы красавіка - пачатку мая Папа на пенсіі плануе перасяліцца з рэзідэнцыі Рымскіх Пантыфікаў у Кастэль-Гандольфа ў кляштар на тэрыторыі Ватыкана. У сваю чаргу, Францішак працягне жыць у Доме св. Марты, “дзе адчувае сябе вельмі добра”. “На дадзены момант, здаецца, што ён не збіраецца мяняць месца пражывання, аднак, гаворка не ідзе пра канчатковае рашэнне”, - падкрэсліў кіраўнік Залы Друку.