Sulm i ri mbi bashkësinë e krishterë në Siri: rrëmbehen dy peshkopë.
Gjithnjë më kaotike, e edhe dramatike, situata në Siri ku, ndërmjet tjerash, u rrëmbyen
dy peshkopët e Halebit. E në sa bashkësia e krishterë është jashtëzakonisht e tronditur,
ndeshjet e ashpra ndërmjet palëve kundërshtare vazhdojnë e OKB-ja kërkon të ndalohen
ndihmat humanitare për opozitën, pikërisht një ditë pasi SHBA njoftuan financime të
reja në këtë drejtim. Disa thonë se ishte përgjigje për masakrën e Damaskut, rrëmbimi
i dy peshkopëve në veri të Sirisë, pranë Halebit. Peshkopët Johana Ibrahim e Bulos
Jazigi, i pari siriako-ortodoks e i dyti greko-ortodoks, u ndaluan dje nga njerëz
të armatosur, ndërsa udhëtonin në kufirin siriano-turk, drejt Halebit. Njerëzit vranë
shoferin, ndërsa dy prelatët i çuan në një vend të panjohur. Bashkësia e krishterë,
e tronditur thellë, kujton edhe rrëmbimin, në shkurtin e kaluar, të dy priftërinjve:
atë Mikel Kaial, armen katolik dhe atë Maher Mahfuz, greko-ortodoks, për të cilët
nuk ka asnjë lajm. Ndërkaq, në Katarr, Jusef al-Karadavi, figurë me ndikim të fortë
fetar, u bën thirrje milicive islamike, që luftojnë në Siri, të heqin dorë nga aleanca
me al-Kaedën e të bashkojnë forcat me ushtrinë e lirë siriane (esl). Ndërsa Irani
vijon të përkrahë regjimin: Bashari duhet të mbetet në krye të vendit deri në zgjedhjet
e 2014-tës. Do të jetë populli ai, që do të vendosë për fatin e tij. Për Sirinë
dje, në takimin e Brukselit, folën edhe sekretari i Shtetit amerikan, Xhon Kerri,
që vizitoi për herë të parë institucionet evropiane, numri një i Komisionit evropian,
Barroso dhe kryetari i Këshillit, Van Rompyi. Mbi tryezën e bisedimeve, emergjenca
e terrorizmit.