Ipeshkvijtë anglezë tek Papa Françesku. Imzot Nikols: Kisha po jeton një pranverë
të re
Ipeshkvijtë katolikë të Konferencës Ipeshkvnore të Anglisë e të Uellsit, në Romë për
ushtrime shpirtërore, u takuan dje me Papën Françesku, pak pas audiencës së përgjithshme.
Intervistuam kryetarin e Konferencës, imzot Vinsent Nikols, kryeipeshkëv i Uestminsterit: Patëm
privilegjin e madh të takohemi me Papën Françesku, të cilit i thamë se javët e papnisë
së tij i kanë dhënë Kishës gëzim e shpresë të re. Mendoj se të gjithë e ndjejmë se
Kisha po jeton një pranverë të re, e cila vjen nga gjuha e gjesteve dhe e fjalëve
të Papës, si gjatë homelive, ashtu edhe gjatë audiencave. Në Mbretërinë e Bashkuar,
duket se të gjithë janë prekur nga gjuha, nga ëmbëlsia dhe nga përvuajtëria e Papës
Françesku. Në avionin për të ardhur në Romë, isha ulur afër një çifti. Flisnin për
një fillesë të re në Kishën Katolike. Në fund të bisedës, i pyeta a ishin katolikë
e m’u përgjigjën: “Jo, nuk jemi katolikë, por shihet qartë ç’po ndodh e Papa prek
edhe jetën tonë”. Mendoj se ndikimi pozitiv filloi me vizitën e Papës Benedikti XVI,
në vitin 2010, e vazhdon tani me Papën Françesku. Mënyra e tij për të folur mbi nevojën
e mëshirës së Zotit, vëmendja e tij ndaj të varfërve, të mënjanuarve, ka prekur shumë
njerëz e jo vetëm bashkësinë katolike.