Пантыфік адказаў на ліст аргентынскіх маці

Святы Айцец падзякаваў аргентынскім маці за іх барацьбу з беднасцю і намаганні па спыненні пакут шматлікіх людзей. Члены аргентынскай асацыяцыі “Маці плошчы Мая” 21 сакавіка напісалі ліст да папы Францішка, у якім павіншавалі яго з абраннем на Пасад св. Пятра. У сваім адказе Святы Айцец пацвердзіў блізкасць да асоб, якія дапамагаюць найбольш няшчасным і прыкладаюць намаганні, каб дапамагчы такім людзям, зразумець іх і задаволіць іх законныя памкненні. Пантыфік моліцца таксама за асоб, адказных за агульнае дабро, каб іх змаганні па барацьбе з беднасцю былі эфектыўнымі і базаваліся на справядлівасці і салідарнасці.

Ліст ад імя Святога Айца падпісаў падсакратар па адносінах Святога Пасаду з дзяржавамі кс. прэлат Антуан Камілеры. “Маці плошчы Мая” (ісп. Asociación Madres de Plaza de Mayo) – гэта грамадскі рух аргентынскіх маці, чые дзеці зніклі падчас правядзення палітыкі “Бруднай вайны” у перыяд ваеннай дыктатуры, паміж 1976 і 1983 гадамі, у Аргентыне. Сваю назву рух атрымаў ад назвы цэнтральнай плошчы Буэнас-Айрэса – плошчы Мая, дзе, насупраць дома ўрада, пачынаючы з 30 красавіка 1977 г., кожны чацвер, сталі збірацца жанчыны, дзеці якіх бясследна зніклі.

Святы Айцец падзяляе боль многіх маці і сем’яў, якія пакутуюць ад трагічнай гібелі сваіх блізкіх у сумны час для гісторыі Аргентыны, гаворыцца ў лісце, і ўдзяляе ім сваё благаслаўленне на знак надзеі і падтрымкі.