Ուրբաթ 12 Ապրիլին, Պաթրունի լեռնային կողմերը 1897-ին կառուցուած Ս. Յովսէփ վանքին
մէջ, կայացաւ «Լիբանանի Սրբավայրեր» Յանձնախումբի 31-րդ ժողովը, մասնակցութեամբ տարբեր
միաբանութիւններու 13 կրօնաւոր և կրօնաւորուհիներու և 2 աշխարհականերու: Այս վանքին
մէջ ապրած է մարոնիթ միաձնուհին՝ Սրբուհի Ռաֆքան, որուն դամբանը կը գտնուի առանձին մատուռի
մը մէջ, ուր այցելու ուխտաւորներ չեն դադրիր յաճախելէ: «Լիբանանի Սրբավայրեր» Յանձնախումբը
մաս կը կազմէ միջազգային սրբավայրերու կազմակերպութեան, որուն պատկանող ամէն անդամ
պէտք է հետեւի անոր օրէնքներուն, որոնց համեմատ սրբավայրերէն ներս հարկ է որ Ս. Պատարագ
մատուցուի տօնական օրերուն և այլ բարեպաշտական աղօթքներ կատարուին և ուխտաւորներուն
հայթաթուին աղօթագիրքեր: Օրուայ ժողովին գլխաւոր նիւթն էր «Օրհնութիւններու Գիրք»ը:
Ան կ'ընդգրկէ զանազան օրհնութիւններ և աղօթքներ, որոնց ուխտաւոր մը կրնայ պէտք ունենալ,
օրինակ՝ հիւանդի աղօթք, մանուկներու համար աղօթք, հագուստի, ջուրի օրհնութիւն, և այլազան
աղօթքներ, որոնք ընդհանուր առմամբ մարօնիթ, բիւզանդական և լատին ծէսերէն առնուած են:
Սոյն գրքոյկը արդէն պատրաստ է և մօտ ատենէն պիտի լոյս տեսնէ: Իսկ Լիբանանի 175 կարեւոր
ուխտավայրերը ընդգրկող գիրքը. «Լիբանանի Սրբավայրերը Ճանապարհդ դէպի Քրիստոս» պիտի թարգմանուի
անգլերէնի, օտարերկրեայ լիբանանցիներուն համար, որոնք յաճախ կ'այցելեն Լիբանան: Ժողովին
նիւթ եղան նաեւ աւելորդապաշտութեան տանող չափազանցութիւնները, ինչպէս ինքնաշարժ և անասուն
օրհնելը: Ժողովին մէջ՝ քննարկուեցաւ նաեւ Սրբավայրերու միացեալ կայքէջ մը բանալու ծրագիրը,
որուն միջոցաւ կարելի պիտի ըլլայ Լիբանանի ուխտատեղիներու մասին բաւարար տեղեկութիւններ
ստանալ: Այս տարի, Յունիս 1-էն 16 , Տիրամօր Մայրի ծառի փայտեայ մեծ արձանը պիտի շրջագայի
Լիբանանի բոլոր քաղաքներն ու գիւղերը: Նման դէպք մը պատահած է 1954-ին: Արձանը թափօրով
պիտի անցնի ամէն գիւղ կամ շրջան ու կանգ պիտի առնէ տեղւոյն եկեղեցիին մէջ: Այս առթիւ՝
Լիբանանի չորս Կաթողիկէ Պատրիարքները յաջորդաբար պատարագ պիտի մտուցանեն Հարիսայի Պազիլիքին
մէջ, իսկ հայ ծէսով Հայրապետական Սուրբ Պատարագ պիտի մատուցուի Յունիս 10-ի՝ երեկոյեան
ժամը 6-ին: