Прэфект Кангрэгацыі Веравучэння сустрэўся з амерыканскімі законніцамі
15 красавіка адбылася
першая сустрэча прэфекта Кангрэгацыі Веравучэння арцыбіскупа Герхарда Людвіга Мюлера
з кіраўніцтвам Канферэнцыі вышэйшых настаяцельніц жаночых манаскіх кангрэгацый ЗША
(LCWR). Іерарх выказаў падзяку за вялікі ўклад законніц у жыццё Касцёла ў Злучаных
Штатах, перш за ўсё за іх працу ў школах, бальніцах і дабрачынных установах. Прэфект
падкрэсліў, што канферэнцыі настаяцельніц існуюць для таго, каб спрыяць агульным намаганням
членаў манаскіх кангрэгацый у супрацоўніцтве з мясцовымі біскупскімі канферэнцыямі
і мясцовымі біскупамі. Па гэтай прычыне, такія канферэнцыі застаюцца пад кіраўніцтвам
Святога Пасаду.
Год таму Кангрэгацыя Веравучэння выдала дактрынальную ацэнку,
прадметам якой стала Канферэнцыя вышэйшых настаяцельніц ЗША. У ёй гаварылася пра сур’ёзныя
тэалагічныя і дактрынальныя памылкі ў выступленнях на штогадовых асамблеях арганізацыі,
скажонае бачанне манаскага жыцця, некаторыя радыкальныя фемінісцкія тэндэнцыі, несумяшчальныя
з каталіцкай верай.
Падчас сённяшняй сустрэчы арцыбіскуп Мюлер паінфармаваў
кіраўніцтва арганізацыі, што нядаўна абмяркоўваў дактрынальную ацэнку з папам Францішкам,
які пацвердзіў высновы Ацэнкі і праграму рэформаў для Канферэнцыі вышэйшых настаяцельніц.