Папа перад “Regina Coeli”: не баяцца нічога і нікога абвяшчаючы Хрыста (поўны тэкст)
Не баяцца нічога і
нікога абвяшчаючы ўваскрасенне Хрыста і Яго Добрую Навіну, запрасіў Святы Айцец сучасных
хрысціян. Ён звярнуў увагу на патрэбу малітвы за тых, хто дае такі прыклад, сучасных
мучанікаў, якія церпяць пераслед за веру ў розных частках свету. Паводле Францішка,
трэба браць прыклад з Езуса, які з Крыжа адказваў сваім катам “любоўю і сілай праўды”.
14 красавіка на плошчы св. Пятра сабралася каля 80 тыс. вернікаў, каб удзельнічаць
у малітве “Regina Coeli” з Пантыфікам, паінфармавала Зала Друку Апостальскай Сталіцы.
Папа нагадаў рэцэпт поспеху апосталаў, якія, будучы простымі людзьмі, змаглі ўскалыхнуць
увесь Ерузалем весткай пра уваскрослага Пана. Толькі прысутнасць з імі Хрыста і дзейнасць
Святога Духа могуць растлумачыць гэты факт, звярнуў увагу Францішак. Гэта прыклад
для сучасных хрысціян, якія, пазнаўшы Хрыста і верачы ў Яго ўваскрасенне, не могуць
паўстрымацца ад абвяшчэння праўды аб Ім, лічыць Святы Айцец.
“Дарагія браты
і сёстры! Добры дзень. - звярнуўся сёння да сабраных на плошчы перад ватыканскай базылікай
Папа - Я хацеў бы коратка спыніцца на старонцы кнігі Дзеяў Апосталаў, якую мы чытаем
падчас літургіі ІІІ Велікоднай нядзелі. Гэты тэкст распавядае, як першая пропаведзь
апосталаў у Ерузалеме напоўніла горад навінай, што Езус сапраўды ўваскрос з мёртвых,
у адпаведнасці з Пісаннем, і што Ён быў Месіяй, прадказаным прарокамі. Першасвятары
і кіраўнікі горада спрабавалі задушыць на самым пачатку нараджэнне супольнасці веруючых
у Хрыста і ўкінулі ў вязніцу апосталаў, забараняючы ім навучаць у Яго імя. Аднак Пётр
і астатнія Адзінаццаць адказалі: “Трэба слухацца Бога больш, чым людзей. Бог айцоў
нашых уваскрасіў Езуса, (...) узвысіў Яго правіцаю сваёй (...) І мы сведкі гэтых слоў,
і Дух Святы” (Дз 5, 29-32). І былі прысуджаны апосталы на бічаванне і зноў ім было
забаронена прапаведаваць у імя Езуса. І яны адыходзілі, як кажа Святое Пісанне, “радуючыся,
што былі годныя цярпець знявагу за імя Езуса”. (Дз 5, 41).
Я пытаюся ў сябе:
адкуль першыя вучні бралі сілы для такога сведчання? Больш за тое: адкуль яны мелі
радасць і адвагу абвяшчаць Бога, нягледзячы на перашкоды і насілле? Не будзем забывацца,
што апосталы былі людзьмі простымі, не належалі да вучоных у Пісанні ці да святароў.
Як жа яны маглі, беручы пад увагу свае абмежаванні і супрацьстаянне ўладаў, напоўніць
Ерузалем сваім навучаннем? Безумоўна, толькі прысутнасць з імі ўваскрослага Хрыста
і дзейнасць Святога Духа могуць патлумачыць гэты факт. Пан, які быў з імі, і Дух,
Які заклікаў іх да абвяшчэння, тлумачыць гэту экстраардынарную падзею. Іх вера засноўвалася
на моцным і асабістым досведзе пра Хрыста, які памёр і ўваскрос, і такім чынам яны
не баяліся нічога і нікога. Больш за тое, пераслед яны ўспрымалі, як матыў для радасці,
які дазваляў ім рухацца па слядах Езуса і быць падобнымі да Яго, сведчыць аб Ім жыццём.
Гэта
гісторыя першахрысціянскай супольнасці кажа нам нешта вельмі важнае, што датычыць
Касцёла ўсіх часоў і актуальна таксама для нас: калі хтосьці сапраўды ведае Езуса
Хрыста і верыць у Яго, зведвае Яго прысутнасць у жыцці і моц Яго ўваскрасення, ён
не можа ўстрымацца ад перадачы іншым гэтага досведу. А калі такі чалавек сустракае
неразуменне або супярэчанне – ён паводзіць сябе так, як Езус падчас сваёй мукі: адказвае
з любоўю і моцай праўды.
Молячыся разам “Regina Coeli”, будзем прасіць аб дапамозе
Найсвяцейшую Панну Марыю, каб Касцёл ва ўсім свеце абвяшчаў адважна ўваскрослага Пана
і даваў трывалае сведчанне гэтага праз знакі братэрскай любові. Братэрская любоў з’яўляецца
нашым найбліжэйшым сведчаннем таго, што Езус з намі, што Езус уваскрос. Будзем асабліва
маліцца за хрысціян, якія церпяць пераслед; у гэты час многія хрысціяне падвяргаюцца
пераследу, многія, многія, у многіх краінах: мы молімся за іх, з любоўю, ад сэрца.
Няхай яны адчуваюць жывую і суцяшаючую прысутнасць уваскрослага Пана”, – заахвоціў
вернікаў Святы Айцец.
Пасля марыйнай малітвы папа Францішак нагадаў, што 13
красавіка ў Венецыі быў абвешчаны благаслаўлёным кс. Лука Пасі і запрасіў вернікаў
быць удзячнымі за сведчанне жыцця гэтага святара. Пантыфік не заставіў без увагі дзень
Каталіцкага ўніверсітэта Найсвяцейшага Сэрца, які адзначаецца ў гэту нядзелю ў Італіі.
Францішак падзякаваў навучальнай установе за тое, што на працягу свайго існавання
яна выхавала і адукавала тысячы маладых людзей, якія сталі “кампетэнтнымі і адказнымі
грамадзянамі, будаўнікамі агульнага дабра”.
Пантыфік прывітаў усіх пілігрымаў:
“сем’і, парафіяльныя групы, рухі і моладзь”, якія прыбылі са шматлікіх краін, каб
сустрэцца з Наступнікам св. Пятра.