Կիւլպենկեան Հիմնարկի Ներկայացուցիչի Այցը Հայ Կաթողիկէ Պատրիարքարան
Պէյրութ- Ուրբաթ, 12 Ապրիլի առաւօտեան (ժամը 11.30-ին) Ամենապատիւ եւ
գերերջանիկ Տ Տ Ներսէս Պետրոս ԺԹ Տանն Կիլիկիոյ Կաթողիկէ Հայոց կաթողիկոս պատրիարքը,
ընդունեց Կիւլպենկեան հիմնարկի հայկական բաժանմունքի տնօրէն՝ պարոն Ռազմիկ Փանոսեանը:
Հանդիպումին ներկայ էին Գերյարգելի հայր Գէորգ Ծ.Վ. Եղիայեան, Հ. Վարդան վրդ. Գազանճեան
եւ Պրն. Կրէկուար Գալուստ: Բարիգալուստի խօսքերէն ետք, պարոն Փանոսեան դիտել տուաւ որ
իր Լիզպոնի գրասենեակէն դուրս ելլելով ուզած է տեղւոյն վրայ տեսնել այն իրականութիւնները,
որոնց հետ պատմականօրէն կը գործակցէր այս հիմնարկը: Ամենապատիւ Հոգեւոր Տէրը յիշեց թէ՝
Կիւլպենկեան հիմնարկը, հայ կաթողիկէ հաստատութիւններուն հետ ճոխ անցեալ մը ունի, ապա
թուեց այն բոլոր հայ կաթողիկէ լիբանանեան հաստատութիւնները, որոնք օգտուած են սոյն հիմնարկէն:
Հոգեւոր Տէրը նշեց նաեւ այլ նոր նախաձեռնութիւններ, որոնք իրականացան հայ կաթողիկէ աշխարհէն
ներս, վերջին տարիներուն, եւ անոնք ալ Մեսրոպեան վարժարանի ամառնային «Ովասիս»-ն ու «Սուրբ
Գրիգոր Նարեկացի կեդրոն»-ն են, եւ Հիմնարկի տնօրէն պարոն Ռազմիկին ուշադրութեան յանձնեց
անոնց տարած աշխատանքները: Ապա Մեսրոպեան վարժարանի տնօրէնը՝ Պրն. Կրէկուար Գալուսր
ներկայացուց հայկական դպրոցներու մէջ տիրող դժուար կացութեան առարկայական համայնապատկեր
մը: Իր կարգին, Կիւլպէնկեանի տնօրէնը՝ Պրն Ռազմիկ Փանոսեան յայտնեց թէ ճգնաժամային հարցերուն
դիմաց ինք որոնումի մէջ է հաստատ եւ երկարատեւ լուծումներու, ապա աւելցուց թէ ան կը փափաքի
նոր գործելակերպ որդեգրել, եւ աւելի յատուկ ծրագիրներու ուշադրութիւն դարձնել: Այցելութեան
ընթացքին պարոն Փանոսեան Հոգեւոր Տիրոջ նուիրեց Գլոտ Մութաֆեանին երկու հատորներով Հայաստանի
մասին պատկերազարդ աշխատասիրութիւնը: Այս սիրալիր մթնոլորտին մէջ, Հոգեւոր Տէրը յոյս
յայտնեց մօտ ապագայի գործակցութեան, որ միայն բարիք կրնայ ընել նոր սերունդին հայեցի
դաստիարակութեան: Ապա վարդապետներուն եւ պարոն Գալուստին ընկերակցութեամբ՝ Պատրիարքարանին
հիւրը այցելութիւն մը կատարեց Մեսրոպեան Վարժարան, ուր նաեւ անպաշտօն կերպով հանդիպեցաւ
աշակերտութեան: