Кардынал Каспер: папа Францішак і яго прарочая інтэрпрэтацыя Сабору
Кардынал Вальтэр Каспер
лічыць, што папа Францішак, з яго акцэнтаваннем праблем беднасці і пытанняў сацыяльнай
справядлівасці, распачаў новы этап ажыццяўлення ІІ Ватыканскага Сабору. Кардынал Каспер
прыводзіць у сённяшнім выданні ватыканскай газеты моцныя аргументы ў доказ таго, што
падарожжа на шляху саборнага абнаўлення яшчэ не скончана і што дзесяцігоддзі дыскусій
аб яго навучанні павінна прывесці да новых “практычных наступстваў”. Новаабраны Пантыфік,
паводле слоў іерарха, прадстаўляе накірунак з акцэнтам на Касцёл, які сам становіцца
бедным і служыць бедным.
Папа Францішак з першага дня свайго пантыфікату даў
тое, што кардынал Каспер называе “прарочай інтэрпрэтацыяй Сабору”, ён змяніў парадак
рэчаў і ўверсе паставіў праблемы паўднёвага паўшар’я. Гэта вельмі істотна, паводле
вядомага нямецкага тэолага, бо калі ў пачатку мінулага стагоддзя толькі чвэрць усіх
католікаў жылі за межамі Еўропы, то сёння толькі чвэрць з іх жыве на Старым кантыненце,
а больш чым дзве трэція паходзяць менавіта з Паўднёвага паўшар’я, дзе Касцёл развіваецца.
Кардынал
Каспер адзначыў, што папа Францішак, здаецца, гатовы да больш калегіяльнага ажыццяўлення
папскага служэння. Роля Папы ў якасці аб’яднаўчай асобы ў Касцёле не павінна прыводзіць
да “перабольшанага цэнтралізму”, напісаў ён у “L’Osservatore Romano”. Гэта мае прынцыповае
значэнне таксама для працягу экуменічнага дыялогу, перш за ўсё з Праваслаўнымі Цэрквамі,
лічыць была старшыня Папскай рады спрыяння хрысціянскаму адзінству.
Кардынал
не падтрымлівае меркавання крытыкаў Сабору, які маўляў стаў “катастрофай і найвялікшай
бядой апошняга часу”. Шмат праблем, паводле яго, узнікла з-за таго, што саборныя дакументы
няслі “велізарны патэнцыял для канфлікту”, паколькі іх кампрамісная мова ў важнейшых
пытаннях адчыніла дзверы для выбарачнага тлумачэння ў той ці іншы бок.
У цэлым,
як лічыць кардынал Каспер, навучанне II Ватыканскага Сабору дало новы імпульс у жыцці
дыяцэзій, парафій і рэлігійных супольнасцяў, асабліва ў рамках літургічнага абнаўлення,
новых рухаў, лепшага ведання Святога Пісання і дыялогу з не-католікамі.