Аргентынскі біскуп: папа Францішак заўсёды перамагаў ідэалогію Евангеллем
Чалавекам дыялогу
і праніклівай развагі назваў папу Францішка яго былы найбліжэйшы супрацоўнік, дапаможны
біскуп архідыяцэзіі Буэнас-Айрэс, Эдуарда Харачыа Гарсія, які ведае Пантыфіка ўжо
на працягу 20 гадоў. Ён адзначыў, што Святы Айцец заўсёды хоча быць упэўнены ў правільнасці
свайго рашэння, таму вывучае праблему, стараецца весці шчыры дыялог, слухаць, раіцца,
быць поўнасцю паінфармаваным. “Ён не дае гатовых рашэнняў, але прымушае думаць і суправаджае
ў іх пошуку”, - сцвердзіў біскуп. Падчас свайго служэння на пасадзе арцыбіскупа Буэнас-Айрэса
кардынал Берголіа “быў аднолькава блізкі да святароў, законнікаў, свецкіх”, - дадаў
ён.
Іерарх лічыць, што не трэба чакаць ад Папы нейкай ідэалізацыі ці ўзвышэння
беднасці. Ён прызнаўся, што Святы Айцец заўсёды надаваў увагу праблеме беднасці і
яе наступстваў, але ніколі не ставіў яе “на п’едэстал”. Ён імкнуўся абудзіць ініцыятыву,
вучыў ставіцца да бедных з павагай, але ў той жа час перасцерагаў ад стварэння сацыяльных
гета або нейкай адмысловай “эклезіялогіі бедных”. Біскуп Гарсія адзначыў, што Францішак
перамагаў любыя ідэалогіі Евангеллем.