Vitorio Mesori: “Për një muaj, Papa Françesku fitoi zemrën e njerëzve”
Njeri i të varfërve dhe i paqes. Një muaj pas zgjedhjes, në mbrëmjen e 13 marsit,
Françesku po ia ndryshon fytyrën Kishës. Jezuiti, që vjen nga fundi i botës, po e
përshkon rrugën e tij, si ipeshkëv i popullit, ashtu si u shpreh ai vetë në përshëndetjen
e parë në Sheshin e Shën Pjetrit. Papa hyri menjëherë në përkim me njerëzit, pohon
shkrimtari dhe studiuesi i njohur katolik Vitorio Mesori. Pavarësisht nga shenjtëria
dhe thellësia e jashtëzakonshme, për shumëkënd, Papa Ratzinger ishte, e është, intelektual
i madh. Ndërsa Papa Bergolio shikohet si prift i popullit, si famullitar, që u uron
njerëzve drekën e mirë e i pyet si janë me shëndet. Njerëzit, vijon shkrimtari
katolik, e shikonin Benediktin XVI si mësues e teolog; Françeskun, si bari, si prift,
të cilin e takon në mëngjes duke bërë shpenzimet e ditës. E kjo u pëlqen shumë. Autori
i librit “Kisha e Françeskut” i fton të gjithë ta njohin mesazhin e Papës argjentinas.
Nëse Papa për ne është simpatik, aq më mirë, nënvizon, por të mos harrojmë: Papa nuk
duhet t’u pëlqejë njerëzve si njeri, por si rojtar e mësues feje.Lidhur me Papën Bergolio
tregohen një mori anekdotash, duke nisur nga historia e këpucëve, për të cilat thuhet
se nguli këmbë në një emision televiziv. Për të kuptuar mesazhin e Françeskut, përfundon
Mesori, duhet të shikosh përtej këtyre gjërave, të reflektosh për fjalët, që thotë
e që na nxisin të mendojmë shumë më thellë.