Papa teologëve: Bibla nuk interpretohet vetëm, por duke ecur në gjurmët e traditës
“Interpretimi i Shkrimeve të Shenjta nuk është vetëm përpjekje shkencore individuale,
por duhet të vërtetohet e të ballafaqohet gjithnjë me Traditën e gjallë të Kishës”.
Kjo normë vendimtare për lidhjen e saktë ndërmjet ekzegjezës e magjisterit, ishte
sot në qendër të fjalimit të Papës Françesku, drejtuar anëtarëve të Komisionit Biblik,
në përfundim të mbledhjes së tij plenare, kushtuar temës “Frymëzimi dhe e vërteta
e Biblës”.
Ç’janë Shkrimet e Shenjta? Cila është vlera e traditës e cili roli
i ekzegjetit? Papa Françesku, duke u folur anëtarëve të Komisionit Biblik, u ndalua
tek temat themelore, jo vetëm për besimtarin, por për mbarë Kishën, jeta e misioni
i së cilës bazohen mbi Fjalën e Zotit, shpirt i teologjisë e njëherësh, frymëzuese
e jetës së krishterë: “Siç e dimë, Shkrimet e Shenjta janë dëshmi,
në formë të shkruar, e Fjalës hyjnore, përkujtesë kanonike, që vërteton ngjarjen e
Zbulesës. Fjala e Zotit, pra, i prin Biblës dhe e tejkalon atë”. Pikërisht
për këtë arsye, shpjegoi Papa, për ta kuptuar Shkrimin Shenjt, është e nevojshme prania
e përhershme e Shpirtit të Zotit, e edhe udhëheqja e Magjisterit, siç ka ndodhur në
Traditën e madhe e si e sanksionon edhe Koncili II i Vatikanit: “Koncili
II i Vatikanit ripohoi me qartësi të madhe në Kushtetutën dogmatike Dei Verbum: ‘Gjithçka
ka të bëjë me mënyrën e interpretimit të Shkrimit Shenjt i nënshtrohet, në instancën
e fundit, gjykimit të Kishës, e cila zbaton mandatin hyjnor e misionin ta ruajë e
ta interpretojë Fjalën e Hyjit”. Ekziston, prandaj, një unitet i pandashëm,
nënvizoi Papa, duke vijuar të citojë Kushtetutën Konciliare, ndërmjet Shkrimit të
Shenjt e Traditës, që plotësojnë njëri- tjetrën e komunikojnë njëri me tjetrën, sepse
burojnë nga e njëjta gurrë e kanë të njëjtin qëllim. Njëri e tjera duhen pranuar e
duhen vlerësuar me të njëjtën përshpirtëri e nderim:
“Në të vërtetë,
Shkrimi i Shenjtë është Fjala e Zotit, sepse u shkrua përmes frymëzimit të Shpirtit
Shenjt, ndërsa Tradita kishtare transmeton tërësisht Fjalën e Hyjit, që iu besua nga
Krishti Zot e nga Shpirti i Shenjtë Apostujve e pasardhësve të tyre, me qëllim që
këta, të ndriçuar nga Shpirti i së vërtetës, me predikimin e tyre, ta ruajnë besnikërisht,
ta paraqesin e ta përhapin. Në këtë mënyrë Kisha e fiton sigurinë e saj për të gjitha
sendet e zbuluara, jo vetëm nga Shkrimi Shenjt”. Prej këndej, vlera e rolit
të ekzegjetit të teksteve biblike, për të cilin është i pamjaftueshëm interpretimi
subjektiv, nënvizoi Papa Françesku, ashtu si nuk është e mjaftueshme një analizë,
që nuk e përfshin kuptimin global, krijuar në shekuj nga tradita e nga mbarë populli
i Zotit: “Interpretimi i Shkrimeve të Shenjta nuk mund të jetë vetëm përpjekje
shkencore individuale, por duhet ballafaquar vazhdimisht, duhet radhitur e vërtetuar
nga tradita e gjallë e Kishës. Kjo normë është vendimtare për të saktësuar lidhjen
korrekte e reciproke ndërmjet ekzegjetëve e Magjisterit të Kishës”. Duke
u përshëndetur me anëtarët e Asamblesë, të cilët i inkurajoi në punën e tyre, Papa
ia besoi Virgjërës Mari, model i bindjes ndaj Fjalës së Zotit:“Ju mësoftë ta pranoni
plotësisht pasurinë e pashterrshme të Shkrimit Shenjt, jo vetëm përmes kërkimit shkencor
intelektual, por edhe përmes lutjes e gjithë jetës suaj si besimtarë, në mënyrë të
posaçme, në këtë Vit të fesë. E kështu puna juaj do të ndihmojë që drita e Shkrimit
Shenjt t’i ndriçojë zemrat e besimtarëve”.