Քերրի Պիտի Մասնակցի Պոլսոյ Մէջ Տեղի Ունենալիք «Սուրիոյ Բարեկամներ»-ու Ժողովին
Արաբական լիկայի ընդհանուր քարտուղար Նեպիլ Արապի կոչ ուղղեց Սուրիոյ մէջ կռիւը ՄԱԿ-ի
Ապահովութեան խորհուրդին ճամբով կասեցնելու, իսկ խորհուրդին կոչ ուղղեց միջամտելու: Ան
ըսաւ, որ տագնապին լուծումը Ժընեւի մէջ փոխանցման հանգրուանի սկսելու եւ ամբողջական լիազօրութիւններ
ունեցող կառավարութեան մը կազմութեան շուրջ գոյացած համաձայնութեան գործադրութեան մէջ
կը կայանայ: Արապի նշեց, որ ռուսերը Սուրիայէն իրենց ընտանիքները հեռացուցին, որովհետեւ
գիտեն, որ կացութիւնը շատ վտանգաւոր է: Ան մատնանշեց «սուրիական վարչակարգին ուղղուած
ռուսական պատգամները», ներառեալ` Սուրիոյ տագնապի բոլոր կողմերուն զէնքի մատակարարումը
դադրեցնելու առումով Ռուսիոյ նախագահ Վլատիմիր Փութինի ուղղած կոչը: Արաբական լիկայի
ընդհանուր քարտուղարը ընդգծեց, որ «Սուրիոյ մէջ կացութիւնը իւրաքանչիւր ժամ, իւրաքանչիւր
օր վատէն դէպի աւելի վատ կ՛ուղղուի»: Իրանի արտաքին գործոց նախարարութեան բանբեր Ռամին
Մեհմանփարասթ դժգոհութիւն յայտնեց, որ Իրաք դէպի Սուրիա դեղորայք փոխադրող իրանեան օդանաւերը
կը խուզարկէ` նշելով, որ այդ քայլը կը հակասէ միջազգային սկզբունքներուն եւ երկիրներու
միջեւ բարի դրացնութեան յարաբերութեանց: Ան ըսաւ, որ օդանաւի խուզարկումը անգամ մը
եւս եկաւ փաստելու «կարգ մը երկիրներու Իրանի դէմ կատարած ամբաստանութեանց սուտ ըլլալը»`
նշելով, որ Իրան պիտի շարունակէ «իր մարդասիրական առաքելութեան ծիրին մէջ» Սուրիոյ ժողովուրդին
բժշկական եւ սննդեղէնի օժանդակութիւն ուղարկել: Միացեալ Նահանգներու եւ Բրիտանիոյ
արտաքին գործոց նախարարներ Ճոն Քերրի եւ Ուիլիըմ Հէյկ երէկ Լոնտոնի մէջ միասնաբար հանդիպում
ունեցան սուրիական ընդդիմութեան ներկայացուցիչներուն հետ: Աւելի ուշ, Միացեալ Նահանգներու
արտաքին գործոց նախարարութիւնը յայտարարեց, որ Քերրի պիտի մասնակցի 20 ապրիլին Պոլսոյ
մէջ տեղի ունենալիք «Սուրիոյ բարեկամներ»-ու ժողովին: Պոլսոյ «Ակօս» շաբաթաթերթը կը
հաղորդէ, որ Սուրիոյ ասորիները կը շարունակեն լքել երկիրը եւ ապաստան փնտռել Թուրքիոյ
մէջ: Անգարա արդէն կը մտածէ սուրիացի քրիստոնեաներուն համար առանձին գաղթականներու երկու
ճամբարներ կառուցելու մասին: Ճամբարները նախատեսուած պիտի ըլլան 10 հազար քրիստոնեաներու
համար: Թուրքիոյ արտաքին գործոց նախարարութիւնն ու արտակարգ իրավիճակներու եւ աղէտներու
վարչութիւնը կը պատրաստեն ծրագիրը: Այդ երկու ճամբարներուն համար յատկացուած է 10
միլիոն լիրա: Ասորիները այս ճամբարներուն մէջ պիտի կարենան ֆիզիքական եւ հոգեւոր պահանջներու
բաւարարում ստանալ, որովհետեւ ճամբարները կը նախատեսուի կառուցել եկեղեցւոյ մը մօտ: