Papa Françesku pret “Papal Foundation”: 50-vjetori i “Pacem in Terris” na fton të
impenjohemi për paqen në çdo nivel
“50-vjetori i Enciklikës ‘Pacem in Terris’, të të Lumit Gjoni XXIII – përvjetor, që
bie pikërisht sot – qoftë nxitje për t’u impenjuar gjithnjë në promovimin e pajtimit
e të paqes”. Urimi është i Papës Françesku, i cili, sot paradite, priti në audiencë
rreth 120 anëtarë të “Papal Foundation”. Delegacioni i shoqatës bamirëse amerikane,
themeluar në vitin 1988, kryesohej nga kardinali Donald Uërl, kryeipeshkëv i Uashingtonit. Gjatë
25 vjetëve, që kanë kaluar nga formimi i Fondacionit, u tha Papa, “e keni ndihmuar
Pasardhësin e Shën Pjetrit, duke përkrahur shumë vepra apostullimi e bamirësie, që
ai i ka shumë për zemër”. Horhe Mario Bergolio kujtoi ndihmën për Kishat në vendet
në zhvillim, formimin e klerit dhe të rregulltarëve, asistencën mjekësore për të varfërit
dhe krijimin e mundësive të punësimit. “Gjatë kësaj kohe Pashkësh, në të cilën
Kisha na fton ta falenderojmë Zotin për mëshirën e Tij e për jetën e re, që kemi marrë
nga Krishti i Ringjallur – tha Papa Françesku – lutem që të provoni gëzimin, i cili
lind nga mirënjohja për dhuratat e shumta të Hyjit e që të mund t’i shërbeni Atij
në të fundmit nga vëllezërit e motrat”. Ati i Shenjtë u kërkoi anëtarëve të “Papal
Foundation” të vazhdojnë të luten për të, për nevojat e Kishës e sidomos, të luten
që “mendjet e zemrat të kthehen kah bukuria, kah mirësia e kah e vërteta e Ungjillit”.